من الحاجات السلبية اللي طبت علينا في مجتمعنا هي محاولة الفنانين والفنانات في تغيير خلقة ربي  وحرصهم على دفع الاف الريالات عشان العمليات التجميلية ولا استشهد في  هالموضوع الا بالفنانة شيماء علي يوم طلعت علينا في  احد المسلسلات و لا عرفناها الا بالحمض النووي  كله من تفخها لبراطمها لين غدن كنهن  حوايف تميس ياناس احمدو ربكم على  العافيه والله لو الفنانه ذي مولوده ببراطم زي كذا ان  مايهناها نوم لين تصغرهن وترجعهن طبيعيات ( اللهم لك الحمد بس ) خوفي  الدكاتره حقين عيادات التجميل انهم يحطون ملصق اعلاني يقولو فيه الان للسيدات وصلنا حديثا ( حقن عالماشي وبراطمك زي الحاشي )  والمشكله بعد ماصرنا نشوف الفنانين فالينها بقوه مع المكياج  وبعد ماقلنا  كودها طفره وتزول للاسف انتقلت العدوى وصرت اشوفها وصلت  لبعض المذيعين اللي  كاثرين علينا بهالقنوات   وصار ما يرتاح  الا لين يطلع علينا مصبغ خشيشته بمسحة روج  ومحكحك خديداته بشوي مبيض  ومكياج  والمضحك تشوف وجهه ابيض ورقبته سمرا  وهذا   في رايي انه  يفتقد للرجوله في داخله ويحس بعقدة النقص  وانا بيني وبينكم بصراحه لا شفت مقدم برنامج (  حاط بخشته ) روج  وماسح على ( خديداته ) ميك اب غسلت يدي منه ومن البرنامج كلبوه  .  ولا يفقع مرارتي الا لا شفته مولع لك شمعتين يمينه  وحاط باقة ورد يساره  ماعاد باقي الا يجيب  كوشه ويرزها بالواجهه يعني الا بيقنع المشاهدين انه رومانسي وطيوب بالقوه

 يامذيعين ترى  المحبه من الله ما خبرناها تجي بالاصباغ والتمايع والكلمات المصطعنه قبل فتره مذيع مستضيف شاعره يسألها  : عقالي مايل ؟   فترد عليه بكل بذاءة ( ماعليك الحلو حلو لو قايم من النوم ) فيرد عليها بكل بجاحه انتي الأحلى .  بالله عليكم هذا لقاء شعر  والا  تريقه  (حنا وش دخلنا بعقالك اللي كنه كفر ) والا  طلبات المتصلين  تجيك مال امها دخل بموضوع البرنامج خطر يدق واحد ويطلب بيتزا  من زود الفراغ  غير حركات الزحلقه للمذيع لا حس ان المتصل بدا ( يخنبق ) تلقى المذيع يردد : الو الو  انقطع الاتصال  حسافه  ناخذ اتصال ثاني . حلوه انقطع الاتصال  اشوى ان المخرج قطع سلك التلفون بالزراديه  الصراحه ماودك الا تضحك وتسمع العجب العجاب  لا جاك  برنامج على الهوا  مباشره  وعلى طاري الهوا ذكرت عبدالله الخير من اغنيته  يانا الهوا يانا وتذكرت اني شفته الاسبوع اللي طاف  يوم خطم علينا  بخطمة ( مدري وش تبي ) بعد ما انتهى من وصلته الغنائية مع الشحروره صبوحه استلمها من مبدأ ابو طبيع مايخلي طبعه واعطاها كم بوسه يمين ويسار  وهي تحاول تجنبه لكن مافيه فايده  ( امر الله شق القربه ) طبعا هي ماكاون ودها لأنها خايفه يتصدع ويتهدم  الميك اب اللي حاطته على وجهها   تحلفون ان الكوافير حقها جاي بفيزة مليص  الظاهر لو تغسل وجهها  في مغسله ان تتسدد عموما بعد ماخلص عبدالله بالخير من اغنيته اللي تراقص معها الجمهور التفت لهم  بالخير وقام ينطل بوسات على الحضور      ( امممه،، امممه ))اللي تهافتوا على تجميعها وبعضها ارتفعت ووصلت طبقة الاوزون وبعضها  توجهت مباشره عبر الشاشات و توزعت على ملايين المشاهدين اللي نصهم قام يمسح شاشته عقبها  وما اقول الا صدقت الفنانة معالي زايد  في احد مسلسلاتها  يوم قالت وهي تنسف يديها :  (( حوش حوش  كترووووا اللي ما يختشوووووش  )) .