أبضآآآآآآي الحارة  (- ، * )

حياة الحارة مليانه بالإثارة  والبثارة  وبما اني عشت لحظاتها بكل شقاوة  بما فيها ملاحق القطاوة وتلحيس المصاص والحلاوه فانا حبيت اعطيكم وصف حي ومباشر للي يصير في حارتنا واعطيكم  العلم( المزبوط ) اللي يجمد على (الشنبوط) <== غصب يركب السجع  بصراحه سالفة أبضاي الحارة  بدت معي يوم كنت في الحارة  وعلى طاري الحارة تدرون انها أكثر الأماكن في العالم للهواش (ولبطولة السكواش)  وجدرانها من أفضل وأكثر  لوحات الذكريات والشخاميط في العالم  واتحداكم تلقون فيها برميل معتدل مافيه عفوج او تلقون الشارع كله مولّع صفه وحده  وهي اكثر مكان تلقى فيه كور متفقعه وقواطي ببسي منطّله   وهي من أكثر الأماكن اللي تعج بالألعاب الشعبيه من طق البير  للمصاقيل للملاحق بالسياكل وتعتبر الحارة من أحسن أماكن الهواش     ( عشان السكك اللي فيها صادّه ) ماحولك احد ،  عموما  كنت مسوي في هالحاره    ( ابضاي )وبحكم اني ملكع  من يوم اني صغير  فانا من بثارتي وشقاوتي  كنت احارش  كل واحد واتلقط عليه يعني امشي تحت المثل المعروف ( ورا ماعليك طاقيه ) <== لا يهمكم دايم يعفجونه وبرجليهم يشوتونه ومع يده يعفطونه ويروحون به لأقرب زباله  وينطلونه  وعلى هالحال لين غديت كلي عفوط  وصعارير شفتو راس دامبي اللي في قرينداز ما تفرقونه عني  يعني باختصار  كل ما مسكت واحد ولفطت به اصير تحته مدري ليش ؟  وما يمر يوم ما سويت مشكله  وخاصه اني كنت هاك الوقت اجيب اشياء واحكمها انا وخشتي مره من المرات  جبت لي كوره للملعب  بعد ما انفقعت كورتهم الخسته ( ذيك البلاستيك ام الوان )  وصرت آمر وأنهي واطلّع هذا واطبب ذا مسوي فيها كاوتش ما نقصني الا اني اطق الكاب <== مهوب عاقل الجوهر .. واذا شفتهم معارضين والا شي اكلف ما علي اجي وآخذ كورتي واطلع الين يراضوني <== قصده يرضّونه L عاد لولا الحيا كان رصعتكم بصورة للفريق  وهو صاقع الابتسامه للمصوّر طبعا هالوقت لا بغوا يصورون احد قالوا له :  

 ( سي تشيييييز  )  وحنا راعين الاصل  والفكره  لأنهم محرفيناها من كلمتنا التصويرية ( سي مطازيييييز ) المهم مره من المراريت بعد ما خذت كورتي و(شحّيت بها ) ناداني واحد من اعضاء الفريق   يعني تقدرون تقولون من اعضاء هيئة التشليخ والتكسير وقال طلبتك يبو هارون  بكره  ابيك تجي عندي بالبيت  ضروري تكفى قلت له :قل احلف ؟ انا  شكيت في انه ناوي يجمع لي عيال حارتهم ويتفاهمون معي  وانا على طول بعد ماوافقت  ما  صدقت خبر رحت  وجمعت لي كم واحد ودزيت لمحل قطع غيار وأشتريت كم مفك عجل <== فيه  مفك بقرة  وكم سكروب مثلث ( اخو جبن مثلث ) ومسطح  ويوم  تقابلنا ووصلنا المكان  حق الجريمه وحنا مافي روسنا الا شر وطقاق والا الدعوى غيرررر شكل مهيب اللي نبي <== يدوّر الشر  .. والى الحبايب اللي يخلون القلب ذايب <== راضع مع مصري .. ماغير استقبال واستنزال وفلة حجاج حياكم الله عسى ماشر وش عندكم اشكالكم ووجيهكم ومخابيكم ما تبشر بخير وصرفناها عاد بان اخوهم عازمنا وحنا جايين نلبي الدعوة وطبعا اخوهم الكبير  توهق وراح لأقرب مطبخ و جاب هاك الذبيحة الطيبه

   وبما ان اشكال اللي معي تخوف  لقيناه ما حط على الغدا سكاكين الله لا يلومه والله ان يقطعونه حتت ويرمونه في الزيت ليزا ليزا نقي وصديق البيت ) <== مهوب يتسدح عند الدعايات ابد  وبخبرتنا صرفناها وقعدنا نقطع اللحيمات بالسكاريب حقتنا وبالمره نكسّر بهن العظامه عشان المخ <== تخبرون مافي راسه مخ   وعلى طاري المخ حق العظم فيه عظم يجي في منطقة ( العصعص ) عطتني اياه امّي امس ولقيته  يشبه طيارة قرقور  اللي كان يطير بها في افتح يا سمسم قبل ما يخمع بها في الجدار  هذي تلقونها جامعه اللحم والمخ والشكل  لا تفوتكم  بتدعون لي المهم دبغنا في الغدا وقمنا من عنده هو  واخوانه اللي يناظرونا نظرات غريبه ( معذورين كل واحد منا كنه حافرن قبر هو  وثوبه )  عاد شكرناهم وتسامحنا منهم على  انعدامية ( الاتيكيت ) والبرستيج الغذائي وعلى توسيخ الفرش والموكيت وعلى قولتهم يادار مادخلك شر ولا قشر <== قشر موز      والحمدلله جت هالمره سليمه وصرت  كل ماشفت راعي العزيمه  قلت له  هاه ماحولك  عزيمه   والا شي   وهو يقول : فكني انت وخشتك ذاك اليوم كنت ابيك تجي تصيّد معي حمام لأن اهلي يبوني ابيعهن  وانت   مالقيت تجي الا حزة الغدا انت وشلتك لا عادها الله من جيّة المشكله الحاره اللي عندنا فيها اعداء ولهم سوابق معنا

  صاروا يجون للحاره حقتنا ويستخفون دمهم  ويحوسون ملعبنا كل يوم نلقى الشبكه حقت الباب مقطوعة  ويفحطون في الملعب وخذ يا خمسات وجلنطات وقبل يروحون يركزون علمهم الخاص على وسط الملعب ( مفك صلصه معكوف وتحته جمجمه ) اجتمعت انا والشله في ملحق بيتنا واستعدينا لمواجهة الخطر الارهابي اللي يداهمنا كل فتره  خططنا لكل شي  وقمنا في الصباح الباكر وطقينا هاك الفويله ومرقة الفصوصه مع حبتين تميس وبدينا  مرحلة التصدي حطينا لوح فيه مسامير في وسط الباب  لأنهم  من اللعانه يدخلون بالموتر في وسطه  مسجلين هدف حديدي  وجهزنا 11 طبق بيض  واربع كراتين طماط  <== حشا طالعين كشته وتوزينا ورا الشجر والبيوت نحتري  وقتهم المعتاد  وكلها دقايق ويجونك الشباب بسيارتين  ويدخلون الملعب  اول سياره راحت للباب نسمت كفراتها  وجته السياره الثانيه بعد مافحطت  وطيحت اللي براسها  ووقفت عنده تساعده  بيلحقون اعمارهم قبل نجي ونكشفهم وكلها اقل من دقيقه الا والعمليه الهجوميه واصلتن ساعه الصفر  ونجيك  ركض يمهم  تسمعون ( وب وب وب وب وي ويووو  ) مسوين الهنود الحمر <== حاط ريشة على راسه  ولا تهون الحصاة المربوطه في خشبه  وينزلون من سيارتهم ونتطاق معهم لين فقعنا روسهم  ( الله من الصز ) ويتلاحقون اعمارهم ويعطوووون  تاركين غنايمهم في ملعبنا  كسّرنا سياراتهم ووديناهن لحارتهم وكتبنا ورقه على قزازهم ( هذي تروعكم والثانيه بين ضلوعكم ) ( وتعيش حارة ام العبس ) ، عقبها بفتره رحت بشتري من البقالة صامولي وميرندا  لقيت اثنين حاجريني عند الثلاجه  يمين يسار  مافيه نحشه  واحد مسكني مع يميني والثاني مع يساري وطلعوا بي  امشي معهم واحس بشي قي جنبي  ناغزني كاني منيب واهم فهو سكروب بس ما تاكدت للحين هو مثلث والا مسطح  يوم جيت بحاسب وانا طالع دفوني  وقالوا حاسبنا خلاص ( ام الكرم يشيخ )  انا ما ذبحني الا اني طالعن الصبح  بدري  يعني كل ربعي فاخين   وامشي معهم لين وصلنا حوش واحد منهم  ويوم دخلنا وخذ ياترجيف وتبقيس لين طلعن دواوير زرق في جفوني   وشفت حمامه السلام تحلق فوق مخيلتي  وتحمّد ربها العافيه  وكل ماجيت اقاوم جتني  طعنه بالسكروب  لين  تفلت العافيه  وصب اثمي دم  مخلوط بميرندا ( الولد رايق بيحلل العلبه )

عقبها سحبوني ودخلوني عشة الدجاج والحمام عقب ما ربطوني وسدو اثمي  بفوطه لاقينها طايحه يحلفون بالله انها لها  سنين مافيه دجاجه ماوطتها وسمدتها   وسكروا علي بالقفل وطلعوا   يلعن ام الموقف يناس  هذا حوش برا الديره محد يمي  وش السواة انسدحت احتري الفرج من الله  ويجيك هاك الديتس الاجودي  ويقعد ينقّر في الفوطه ويلعب بها لين سحبها بمنقاره الذهبي  ياهووووه   من فرحتي  زعقت بوجه  الديتس : بق بق بقوووووق الله يفتحها بمنقارك يشييييخ  عاد هالديتس فرك عيونه بجنحانه وش هالدجاجه المتعافيه ويوم قرّب مني وانا اللي ابقسه بيديني المربوطات اعقل وخلك رجال لعنبوا اللي انت ديتسه كني اتخيل  روحي بكره باطن البيضه في الفصل المهم قعدت اعضض الحبال لين فكيتها  تعرفون عاد الجوع  كافر  قرقرته ببطني  ما تفرقونها عن صوت ذكر الحمام اذا توحم بقطوه  ( بق بقرررر بق بقرر )  ( فيه بق ثور بق ثور ) J  والقط لي كم بيضه  من صندوق الولادة   وادربيهن كني بو عنتر في مسلسل  ياسين  وامسك  هاك الفراخه  واشب لي في خشاش بالعشه واشويهن   لين طق  بطني ( بع  يالله لك الحمد ) <== حشا في  فندق الاخ    بيني وبينكم  عشّه خمس نجوم

عاد مع الشبعه جت الفكره  ومالقيت احسن حل للطلعه الا اني احفر تحت الشبك مدام الارض رمل  وجلست ساعه  انبش كني جربوع لين اشرقت الحريه بوجهي  وما امداني اطلع الا والدجاج وفراختهن وراي كل شوي طالع واحد مع الحفره  والقطاوه يدخلن  مسويات حملات تفتيشيه للحمام المسكين  المهم رجعت للحاره حقتنا بعد ان  انهكني الجوع ( يالحمار توك دابغن لك  في بيض وفراخه )  انا حقدت وطلع زبد باثمي  وتواعدت انا وخويي نعفجهم  بعد طلعة المدرسه  ونخلي دروسنا اقوى من دروس المدرسه  ( ياهووه يالتعبير )  طلعوا  وقلنا لهم الوعد عند  الحوش ولا تنادون احد كان فيكم خير   رحنا هناك وتواجهنا  فيس تو فيس  كل واحد واقف قدام الثاني وبما اني متاثر بالافلام  حاولت اخوّف الخصم  واحاربه نفسيا  قلت : هي مآآآآآن أي ويل كيل يو ناو ) يو آر دونكي ç ياويلك من الله قام يتنافض

رد علي وقال : يو آر وع مان  يو آر كخ مان   .. آي ويل ( قبص ) يور هاند  آند ( تف ) ان يور فيس ياقطمة الرز 

  عفجت  سيقاني على طريقة كاوبوي  ونزلت الطاقيه قدام  بحركه تعبر عن الاستهزاء وطقطقت باصابعي ورقبتي  وجيتك ركض يمّه  وحطيت خشمي بخشمه وقلت بكل تحدي   منتب كفو  ياطباقة القلم ابو نص وقعدت احارشه    منت قدي اصحى التحدي وعلى طاري  التحدي  ذكرت  ولد اختي  يوم يلعب بالسوني  بشريط كاراتيه ويتطاق مع واحد المهم هالواحد يطق فيه ويدبغ فيه وولد اختي ماغير  يصارخ عليه مع كل طقه  : قدها هاه  قدها ، قدها  وآخرتها قيم اوفر وقاعدن يصيّّح عند امه ،  نرجع للهوشه ما امدانا نتشابك صز  ونتراقص بالبقوس   الا وهاك الكرتون الكبير اللي طايحن بيننا   معضّل  وحاطن يديه على جنبه تتوقعون من صار ؟   من غيره ذا البثر حليب السعوديه   بشحمه ولحمه  آآبوه آبو من جابه يشيخ قام  صرخ بوجيهنا وقال : اشوف واحد منكم ماد يده عالثاني ورب الكون لأخليه فلافل بالجبن يالله تقلعوا لا بارك الله فيكم  ولا من جمعكم طبعا مالنا الا الفرآآآآر اللي مابقي بعده الا اكوام  الغبآآآآر وكل واحد فينا لسان حاله يقول : امووووت واعرف من اللي ناداه  L وبعد البحث والتحري  اكتشفت ان خويي المطقوق والمطفوق جا يبي فزعتي  وبدال ما يقول : الحقني  ( يا ابضآآآآآآآي الحاره )  غلط وقال : الحقني ( ياحلييييب السعودية )   وجا هالماصل ماصدق خبر احد يناديه  الله ياخذه  عجلن ما ابطا

 آه بس لو انه تاخر شوي  كان عفجت الولد ومسحت بخشته الارض  <== اقول احمد ربك بس اللي غلط خويك  والا كان غدت الصعارير براسك كنهن نقانق 

===============

   

الصفحة الرئيسية

حقوق الرقعه محفوظه لأبوهارون