ياهووووه
يالعيد اذا طل علينا بفجريته وصبحيته
اللي لها نكهة مهيب طبيعية وهالنكهه
ايام زمان
يوم كنا نحتريه
من اول يوم في
رمضان ونحسب له حساب
بالشروخه والصواريخ ودستات ام حمامه
واذا جت صبحية العيد تنتابنا ذاك الوقت (براءة
شقية وشقاوه بريئه)
(يمديكم على هالفلسفة) ( لو تدفون
ابيض ما طلعتو هالجمله ) وعلى طاري
الابيض فيه
نكته تقول ان
فيه ناس يدفون ابيض تدرووووون لييييييش
؟ ( لأن الأبيض مغرز )
كخخخ مهيب
تضحك خابر ،
المهم ارجع
لموضوعي ، اذا جا فجر العيد لبست
الجديد وحملت القش حقي عدة ( الحرب ) ورحت
لساحة الزيييييييييط طع
وخذ يا احتفال واستعراض هذا صاروخ
رايح وهذا
صاروخ رايح (
تحسبوني بقول جاي
) واحد صفر
ماعليه . واذا بدو الناس يجتمعون في
البرحه وقاموا يتخامون مع بعض ويدحجون
ظهور بعض وكلن قام بقلط
غداه وعيده تسلطنا عليهم بالصواريخ
العشوائية لدرجة ان واحد من الصورايخ
دخلت على واحد في غمارته
وهو جاي ، ما
عنده من الشيطان طاري وانفجر الصاروخ
في ثوبه الجديد
ونزل الضعيف من الموتر صايق ويلعن
في سقاف اللي اطلقه وثوبه من جد
متشقق ماعاد ينفع
( قولة مالك الا
المغسول ) ما كتب الله يتهنا به هذا غير
اللي يمر من عندك يبتسي
وش فيك تبتسي
ياهوووه والا
دريت الى واحد اكبر منه ساطره وماخذ
دستة الشروخه منه ؟ ياويله من الله يوم
شافه قعنبه نتّف
منه الدسته ؟ واللي يفقع البطن من الضحك
اذا شفت واحد خان
ابوها وماسك
يده اللي مورمه عشانه انفجر في يدة شرخ
ابو حمامه او ابو ديتس ،
لأن بعضهن من جد
يغدر بالواحد تشبّه وتقضي فتيلته
ويخمد تحسبه طفى واذا شلته من الارض (
طططعع ) وما تشوف الا زراق يدك؟ اما اللي
يمسك الصاروخ
من طرف عوده وهو شاب
هذا اخرو عن دربه
جريه من جد واذكر اني سويتها مره من
المرات ويوم انتصفت
الفتيله وانا اللي استعجل ( حلوه استعجل
الا خايف ) وافلته
والا يوم طاح
تحتي ولحق واحد من العيال ومن الروعة
عط وصقع في الماصورة وصعرر راسه ؟
وصارت ذكرى للعيد كل ما لمسها وهو
يمرش في راسه ،
عاد اذا
طقنا الجوع لازم الواحد منا يروح
يبهنس مع الناس
ويدبغ في الأكلات المنوعة
ومدام الواحد صغينون فهو يبي يلقى
مكان ويبي يشقص بين هالناس
واذكر مره من الامارير ( على وزن
الازارير ) لقيت عيدية كلها ( تسبدة
ولحم ) وعليها
مجموعة وانا
اللي ادوخ من زين نظرتها واجيك
ناحرهم واشقص بينهم
عقب الغثا وما دريت الا واللي جنبي
يشيلني مع غالوقة ثوبي وينطلني في صحن
ثاني ولا تقولون شايل
قطو ؟ وانا اللي احقد
عليه ذا النذل وانا اصد شوي واروح
اصك اللطمه ( سرا يالشماغ ) وأمر من
عندهم واذب عليهم دستة
ام حمامه
كامله بما فيها من (
متفجرات ) في وسط
صحنهم اللي يرشخون منه والا يوم
تناقزت ( التسبده في ثيابهم
، ووجيههم قامت تقاطر من المرقه اما
انا فالجرس حق الطبلون يزاعق من السرعه
بيني وبينكم لو
مسكوني ان يقلقلوني في هاك البرحه ،
قايل لكم شقاوة
بريئة .. بس يقهرني شي واحد الاحظه دايم
في كل عيد وهو
انه يجيك ناس
يجيبون عيدهم الدسم ومن يوم
يحطونه ويصفونه على طول يقعدون على
صحنه ؟ وش
استفدنا اجل ؟ لا والخافي اعظم فيه ناس
قالك من
زود الكرم جايبين
مفطح طيب ؟ وما غير تلقاهم هم ومن يعز
عليهم متربعين
عليه ولا يقومون الا والعامود الفقري
يتلاصف تعد فقراته من القهر
؟ ما صار عيد هذا كان
كل واحد يحط
عيده في بيته وياكل منه وبس ؟(
اما حاقه
تئرف بصحيح ) واكثر شي يقهرني انك
تكون جالس انت وخويك في ملحقه مع
ربعك وساهرين ليلة العيد على فلم
بيغ ماما مثلا واذا
جا صبح العيد خذ
( يامجاغف ) (
وتحبيب) يخوي امس
مال من خشتك ومقابلك
زين اللي احط يدي
في يدك واغلبهم
مهوب حبن فيك يا انه ما بعد
غسل يدية ووده يملطخهن فيك من زود
خفة الدم والا تلقاه طايرن في
العجه لدرجة
ان واحد منهم لقيته ( ناحرن ) عامل مزكرت
ولابس شماغ وعلى طول حط
يده على كتفه وداره يمّه
ويوم حب
خده الايمن سمع
العامل يقول ( إيد مبارآآآك صديق ) والا
يوم دفه مترين وكشّر بوجهه
وقال الله لا يبارك فيك ؟
يخوي كمل سلامك طيب والله انه ابرك
واملح من نصف اللي عندك
في المعيد لكن
مثل ما قلت لكم يطيرون في العاصوف
يحسبون السلام لربعهم بس
عاد ما ودي اطول عليكم لأن وراي
الحين صفقات بيع لأني اعتبر الممول
الثاني بعد نويّر
حقت ام الحمام ولا
يطلع لأحد والا ترى ابذب عليكم دستة ام
جنيب واخلي هالصفحة بكلماتها تسارب على
خششكم J
