بعد المهزله اللي شفناها في السوبر ستار  طلع لنا برنامج الهوا سوا وما امدانا نصحى من صدمته الا جانا برنامج  ستار اكاديمي وخلانا نصفق يد بيد ونحوقل  على وصول  التفكير العربي الى هالمدى من التخلف  طبعا البرنامج يتكون من  مجموعة طلاب ف مدرسة اكاديميه ( يسمعون بالمدرسة ) ماعندهم سالفه ابد  كل شي مصطنع فيهم ماغير يدوجون بهالبيت  لا شغل ولا مشغله ولا جا تصويت وطلع منهم احد  تقولون بيودون اللي طلع للقصاب صياح ونياح مالها اول ولا تالي  عاد من القهر لقين نفمسي  اصور مشهد من حلقه اكاديمية شواطئية وحبيت نعيش بين دعاسيقها   

لقطه للكاميرة وهي تعرض اجزاء البيت الشايب وائل  هناك منجطل على ظهره وحاط  رجله اليمين على رجله اليسار ( قل رجل على رجل وخلصنا ) ويلعب بكراش وكل شوي نسمع كلمه اللعبه اللي توسع الصدر (  بودي قااااا )

لتنشق ابتسامة وائل  بعد ماشاف الكاميره كل هذا بيتميلح بسن الذهب

حصيصه  قاعده عند المقرصه متربعة وتقرص  بحكم ان  أم المخرج عندها عزومه وطالبتن منها  قرصان  لزوم تخلصهن قبل المغرب

ولقطه من الكاميرة على اناملها المحمره من كثر القشع  في ظل صرخات الكوي من المقرصه ( من قال لها ماتقشعهن بسكروب )

 في المطبخ تعكس لنا الكاميره  الشاب اللطيف وهو يصلح قرص بيض  ويقلب فيه بحيث انه يرفع القرص  لين  السقف  ويرجعه للمقلا مره ثانيه بحركه مهاريه ومن مواهبه في الطبخ  انه يصلح قرص عيون وقرص عين وحده وقرص يغمز وهذي  الموهبه راح تفيده فيه الاكاديمية

واذا رحنا للصاله لقينا  البنت صوفيا  حاطه راس خويتها على رجلها وقاعدة تفلي في راسها وتغني لها مقاطع صبيانية بصوت جبلي عذب  :

ياقملتن تحت الشعر / تمشي ولا تحس بخطر

مدام هالاصبع حضر /  باقصعها قصعن محترم

واللي منسدحه تردد وراها  محترم  الله الله صح لسانتس

البيض والا هالسمر  /  والارطى مع شحنة سمر

ما تسوى عندي هالقمر/  افلي شعرها وابترم 

           غنوا معي ترم ترم

           غنوا معي ترم ترم

 

بينما الشاب خلودي  يتفاعل معهم ويعطي لمسات على سطل الجرانيت وقدر الطبخ   ويعزف  مقدمة  بنك  بانثرررررر 

 وبالمقابل فيه ( الشاب مطنوخ )  يلعب مصاقيل مع ضديده وللأسف الشديد حافرين حفره بالصاله بمفك العجل ومخربين السراميك  ولا خصلوا  حطوا الكنبه عليها كنهم  ماسووا شي

ولقطه ثانية  في سطح البيت  (الشاب البثر ) يلاحق الدجاج  ويرجفهن  ويعكس لنا تصرف عدواني ضاربن  بجمعية الرفق بالحيوان  عرض العشة   ولما ساله المرافق ليش تسوي كذا رد بكل برود : من قال لهن ما يبيضن اليوم 

( يابن الناس اتركهن يمكن عندهن تحدد  نسل ) 

بالمقابل احدى الفتيات  في وضع استرخاء وجالسه القرفصاء و حاطه حبتين خيار على عيونها ( مدري شلون ماطاحن )   وكوسه على خشمها  وداهنة  وجهها  بعسل والذبان تدودي عليها  وهي مادرت

عاد في وقت الدرس الرياضي والمحافظه على الرشاقه وتقييم القدرات الجسميه ( ماخالفت اجسامهم  البلا في عقولهم )

 اول متسابق راح يوقف على راسه  لأطول مده ممكنه والحسابه بتحسب ومايهم الوجه لو  غدا  كنه دجاجه محمره تدور بها اصياخ الزمن

 وبعد هاللعبه   ننتقل للعبه اسمها ( حبشه )  لكن هاللعبه سببت مشاكل كثيره لأن فيه متسابقين  يحلفون ان اللاعب مالمسهم الا  بطرف اصبعه وهذي حسب قوانين الفيفا  ( ما توكل عيش )  يعني لازم  تطحله مع ظهره  لين  يقتنع

وبما ان اليوم الجمعه فشي اكيد يكون حفل مفعم  بالتصويت لتتفجر فيه  المفاجاه بخروج (الشاب  البثر)  بفارق صوت واحد عن  (الشاب مطنوخ ) ليطربق الحفل على راسهم  بعد  ماخربها  على طريقه لا صرت رايح  كثر الفضايح

ويتحول في غمضة عين من ترجيف الدجاج الى ترجيف الجمهور وسط منظر مأساوي تخلله  تراشق طبق بيض كامل لتنتهي الهوشه بصرخات  الشاب البثر لإدارة المدرسة  وهو طالع : والله لاحررررق العشه  مثل ماحرقتوا قلبي ، طبختوها هآآآآآآآآآآآآآآآه ... والله مااخلييييييييكم