رحلة الى عالم المريخ

من بعد صلاة العشا وانا ماخذن بساطي وزمزية الشاهي والدربيل حقي وطالعن للسطح احتري الحدث الكبير

حدث ماصار من ستين سنه من زمان وانا يتقطع قليبي على هالمريخ ودي اشوف وشو من آدمي كل ماطق عودن في عود جابوا طاريه

صار الواحد لو بتساله انت من وين رد عليك بضحكه من المريخ ، وصار الواحد لو بيسال عن شي قديم قالوا له : ويييين عايش انت بالمريخ ، هذا كله كوم والكوم الثاني اللي خلاني احرص على هالكوكب هو سببين اولا اني اشجع المريخ السوداني ياملحهم والله لا شاتوا الركني وطش الجبص لين غدت الكندره بيضاء ، والثاني اللي هو زبدة الموضوع اني اسمع ان فيه مخلوقات فضائيه هالمخلوقات اللي تقول : يب يب آها آها يب يب آها آها روسهم مدورة وفوقها زي قرون الاستشعار معلقه في آخرها عيون وعلى روسهم قزازة طبعا هالوصف كله على ذمة افتح ياسمسم هم اللي طبعوا قبلة هالذكريات على خششنا اللي تتقاطر كل عصر تحتري برنامجهم <== آبوك يالتثقيف

وش نسوي هذا كعكي يفرم في الكيك وهو ماله سنون

وهذا نعمان دب يالله يمشي ولا عمرنا شفناه ياكل مع انه مرابط في البقالة حقتهم

<== شطح عن الموضوع

ارجع للموضوع بعد ماتواسيت بالسطح واقتربت ساعة الصفر لاقتراب هالكوكب طقيت الدربيل وقعدت اقز واقززززززززز واتمقل سبحان الله شي عجيب محلات وسوق خضرة وعماير وعالم تخترش تحلفون انهم متوحمين بطوكيو

بعدها قربت الدقه حقت الدربيل ولقيت هاك المخلوق يدربل مثله مثلي والاه موجهه يمي وانا موجهه يمه قلت يولد لا يكون قاعدن يقز الحاره وارفع يدي والا يوم رفع يده وانزلها وينزلها ؟ يالله سكنهم مساكنهم الرجال حاط عينه علي قلت يبو هروني الدعوى خاربه خاربه خل اعميها وش وراي واشرّ له بيدي واقول تعال كانك ولدن لابوك انت وقرونك هاللي مركبهن من انتل بيجو

وما امداني اشيل الدربيل عنه الا وهاك اللي يولّع فوقه زي السفتي ونوره متجه يمي اثر هالمخلوق ماصدق خبر دق سلف وجا بالطبق حقه لاحوووووووول شكله من ربع المشاكل وانزل تحت بسرعه القط مفك اسطوانة الغاز واجيب النباطه واحتريه يقرب واتويقع في راسه ابطش هالقزازه اللي تحمي دمجته وكل ماطقيتها ماجاه شي ورجعت الحصاة صارت بلاستيك مقوى ويوم شافني انبطه قام سكر على روحه بالطبق ، ياولد حركات حتى اطباقهم الطائرة فيها كشف

يوم درا اني احاربه قام واطلق ليزر خفيف وانفجر جنبي لدرجة انه طيح هدومي المنتشره <== الزم ماعليه صروال السنه

شفت الدعوى تسذا اخذت فنيلة الخباز اللي طايحه وربطتها بعصا وقعدت الوّح بها معلن استسلامي لين قام يحوم فوق بيتنا ووقّع بالطبق حقه فوق الخزان ونزل مع السلم وانا شوي ويغمى علي ولا تقولون بحلم وش يبي ووشو له جاي ووشلون بحاتسيه ومهناش ماطرا في راسي لين وصلني وانا اتنافض ويوم قرب عندي ويناطر بالدربيل حقي شوي ثم يناظرني ويقول : لعنبوا دراكم ياحقين الارض فيكم لقافه مهيب في كوكب ثاني وشوله قاعد تقز بيتنا ومحارمنا هاه ؟ وش تبي وش عندك او تناظر الشغاله وهي تكب الزباله ؟

انا دوروني ما ادري الخزان يهرب عقب الليزر حقه والا شي ثاني يمشي تحتي الدعوى فيه عربي وين اليب يب والآها والآها

قلت له : والله ماتلقفت ولا قصدي شي من اللي فبالك بس بشوف هالمريخ وش يصير هو فيه ناس والا جبال وبس ، وبعد ماحلفت له ومسحت القزازة اللي على راسه ونظفتها له وطبعت قبله عليها طاب خاطره وقال اركب اخذ بك لفه بديرتنا وتشوف بعينك ولا يدري احد

قلت وشلون مايدري احد ناظر تحت الشوارع مليانه اوادم من شافوا هالطبق موقع وكله يقبس بالانوار وهم مرتاعين ومجتمعين

واحد من الربع تحت يزاعق يبو هارون هاللي فوق بيتكم طيارة قرقور ؟

رد خويي قال اسفهه بس ومشينا صرفهم انت بعدين قل لعبوبه شاريها بالريموت كنترول وقاعد العب بها بالسطح ،، والله مشت الفكره براسي وركبت معه وشرطت عليه اني اركب قدام صرخ بوجهي اركب واحمد ربك <== مطلع يده مع القزازة

ويقلع بي ابو الشباب وتبدا اللقافه وش اسمك يالطيب :

قال : اسمي مطربقها فوق دماغهم

قلت وجع هذا اسمك الاول والا الثلاثي ؟

قال لا الاول قلت اجل وش الثلاثي ؟

قال : (( مطربقها فوق دماغهم احسن من قال لهم يتلقفون الملعن ))

كتمت ضحكتي خفت يجدعني بالطريق قلت ونعم والله حياك يبو فوق

جعلي ما اشوف شجرة العايله يحلفون انها غابه مهيب شجرة

ابسالك جدك اللي اسمه دماغهم هذا يعتبر المفكر حقهم يعني ؟

قال : لا هذا اذا ذبحنا ديناصور مهوب ياكل فيه الا الدماغ وسميناه كذا

افااااااااااااااااا عندكم ديناصورات ؟

قال اوووووووه كثير ذكرني اعطيك لا وصلنا ترى الفليزر مليان

احم كح كح <== بدا الاكسجين ينقص

والا الرجال معه دبة اكسجين صغيرة حاسب حسابه الاجودي

واخيرا وصلنا للكوكب ومن يوم نزل في حوش بيتهم <== حاط مدرج ولد النعمه

وينزل ويفتح لي الباب ونطلع للحي حقهم نتمشى ويوريني هذا محل فلان وهذا كشك علان وهنا يبيعون التمر <== مابعد نصّف

وهذا دكتور المستوصف حقنا

سبحان الله نفس المشيه او كل الدكاتره تسذا هههه

وانا اتحمد ربي من هالاشكال اللي توافيني عالم غريبه جد واشكال تختلف عن بعض ما روعني من قلب الا هالاشكال ودريت بعدها انهم يجون من كوكب ثاني ياخذون اكل بالغصب ويروحون

ياربييييه حتى بالمريخ فيه اضطهاد المهم يوم شافهم خويي ويسحب يدي وينحاش

وش فيك يامطربقها

قال اخاف يطربقونها فوق دماغك انت وخشتك لاشافوا مخلوق عجيب خذوه يحسنون النسل عندهم هناك

اييه عادي طيب <== خق وانبسط

وش عادي هم اشكالهم وقحه وناوين يداهمون الارض علشان يخلونهم يقولون خلق الله حسن

قلت وشو ذا اسم ؟ <== ما ينلام

ياخي عادي خل اروح معهم تراني طفشت من العزوبية

صاق علي لين احمرت عيونه واشوف عروقها كنهن اسلاك كهرب

انت كلن تبي تروح معه تراهم هناك بياكلونك والا بيخلونك لعبوبه لعيالهم

افااااااا وين تحسين النسل اجل

وانت مصدق <== زحلقه

كمخني بالانتل حقه عشان اصحى من تخيلاتي ورجعني للبيت حقهم وقال اركب بس خل اوديك لا ابلش بك وانا معاند مابي ارجع مابي مابي تكفى خلني اعيش معكم هنا قسم بالله طفشت من الارض واهلها

ابكنس بيتكم وابغسل مواعينكم وهدومكم <== مالهم الا طقم واحد

بس تكفى ابوس قرون الاسشتعار حقاتك خلني

شاف شكلي انرحم وحالتي حاله قال خلاص بس منتب مطول عشان الاكسجين اخاف تفطس علينا

قلت خلاص اسبوع يكفي هالدبّه وابرجع اعبيها <== غاز مهيب اكسجين

ناظرت والا خويي ضايق صدره ويبتسي وانا انكسر خاطري وش فيك يابعد حلقات افتح ياسمسم كلها

وش فيك يا بعد البنكرياس حق نعمان

قال : ياخي متخرج هالسنه من الثانويه ومالقيت شي يقبلني

ههههههههههه

لاحوووووووووول

حتى هنا بعد

اقول تدري ماعندكم كابينه بالمريخ ؟

و .......

ابوهارون

ابوهآآآآآآآآروووووووووووووووووووووون فوجع يوجع قلبك

وشوووو هآآآآه نعممممم

نعم يمه

قم صل

ان شاء الله