المتعارف عليه هو ان البزقات والأطفال الصغار هم تسبودنا اللي تمشي على الأرض  يعني اذا قال لك  واحد ( يا تسبديه )  فهو يقصد يا طفليه يعني انك  بزر وان كانك سكت له فانت منتب رجال ؟ ( مانقصني الا شوكه وقرون ) اما اذا قال لك يا بعد  تسبدي فهو يحبك ويقدرك لأنه فضلك على ولده اللي يحبي على الارض   وقصدة يا بعد ولدي ،  عاد عقب هالمقدمه ودي اشبك الشاحن على نقاط مهمه في تربية النشء ( مهوب اللي يحط على الشماغ ) لأن تربية الاولين في الماضي ( اجل فيه اولين في الحاضر ؟ ) كانت التـــزامية ( والتزا خمسين ) ( وبلوت ) ، وقامت مخيلاتنا بسبتها تعفن واندبلت تسبودنا من القهر  وتعششت في روسنا مظاهر واشكال غريبة  وترويعات مريبه ما ادري وين جابوها اهلنا منه اجل بالله عليكم فيه شي بهالدنيا اسمه ( العو ) او ( بديخ ) ولا يهون السعلو وام الخلاقين ؟ يعني انواع التربية هاك الوقت اللي كانت تعتمد على الترويع والتهديد باجسام ومخلوقات فضائية ( ايه هين ام الخلاقين فضائية)   واذا جت الواحد بتسوه ووده يفضفض بدموعه وصراخه جته امه او جدته ومشت باصابعها قدامه وقالت له  ترى ان ما سكتت  يبي يرقا عليك  بديخ ؟ واذانك  ما تسمع الا نشقة الصمت  والروعه عز الله ان الواحد  هاك الوقت مابعد  نبت له عقل والا بذمتكم  اصبعين يمشن وش المضره فيهن   ويوم بدا يكبر عمرنا شوي قام اسلوب التربية يخوفنا بالشرطي ؟ والدكتور ؟  يعني هالدكتور ماعنده شغله الا يسكتنا هو وابرته مع انهم هالحين  مايعطونا وجه وحنا عندهم في شغلهم  وشلون تبونهم  يجون لنا علشان يسكتون صياحنا بابره ؟ ( وش رايكم في الذبه ) هل تسمعني يا شبكشي ؟  لا واللي غابنني اكثر ان روعة الدكتور  صارت تكبر معي واذا جت مناسبة تطعيم ورحت للدختور تجيني حالة الشهاق في كل مره اروح له مدري هاالحاله تجيني من ريحة الديتول حقت المستشفى او من طاري الدكتور  وبيني وبينكم  الى الحين وانا اشاهق   وخاصه اذا شفت سماعات وجهاز ضغط  !؟ واللي عقدني اكثر اني اذا شفت لي سستر معها ابره والا شي اقعد  اناهق من الروعه   لكن الله لا يورينا مكروه ولا يحدنا لهم  المهم اخرط الريوس لموضوعي  واذكركم ايام بزارة منول   اللي  كانت تحتوي على المطامر والطردي في المجابيب والتدحوس في الارض والمشامخ على الجدران والتسابق على تلقيط العبري بعد يوم عاصف  وكانت ممتلكات الواحد فيهم عبارة عن صندوق او صدنقه صغيره بعضها مصدي وبعضها طاقه الجوع وتلقا اطراف الصندوق  متسفطه ومتعفجه وفيه من القراشيع  الشي الكثير يعني اي شي يلقونه يحطونه فيه ، وكانت  العابهم هاك الوقت ما تعدى  المصاقيل  وحبشه والصقله  ولعبة الخطه وام ثلاث  ويوم   تطوروا شوي وبدت تغزوهم اطراف الحضاره  قاموا يلعبون  ضومنه وداب ابو سلم وعلى طاري لعبة  داب ابو سلم تصدقون ان اخوي الصغيرقام يبتسي وانا العبها  يوم  بلعتني هاك القامه الكبيره اللي فوق ووصلتني للبدايه الضعيف خنفته العبره راحمني وبعذره والله يا  معها خشتن يتربع فيها الظاطور  ثم تطور الوضع ووصلتنا  بلاوي التوالي ( يمديكم على الوصف ) وما يشوبها من الكترونيات خلت اطفال اليوم يعيشون قدامها وصارت هي اللي تربيهم وتعلمهم فنون القتال والدفاع عن النفس ( عاش التومب رايدر )   ووصلتهم الحين موضة البوكيمون   وعلى فكره ترى البوكيمون يصير ولد عمة البوكلين  بس انهم يتغطون عن بعض ، وبدا يغزو عقول اكبادنا ويعشش فيها ، وصرنا  عقب هذا كله نترحم على ايام  زمان ونقول الله يحلل بديخ،   وام الخلاقين عند البوكيمون   وصار البزر ما يسكت الحين الا بقولة  جاك البوكيمون جاك ؟ يسكت من الفرحه  مهووووب خوووووف  L