ا

الحمدلله هالايام المطر يرزح بزخاته على شينكوات بيوتنا ومظلات سياراتنا وصنادق عشتنا ويعانق يقطراته أرض المحبه جعلها الله امطار خير وبررررركآآآه وعممما بنفعهآآآا أرجاء البلالالاد

وبما ان الارض بدت تربع <== فيها بيض وسلايق وتخضر جوانبها  وزي منتم شايفين الازهار يلعبن مع بعض ويحترن اقرب نحله عشان تمتص رحيقها 

بصراحه شي حلو ان الواحد يكون نباتي عشان يضمن الصحه والقوه لجسمه واكبر دليل شوفوا الارانب وشلون فروهن ناعم وبشرتهن حلوه وبياضهن ناصع ولا مسحوق كلوركس ولا تايد مبيض ابد من

هالتغذيه المفيدة الطبيعية  وشوفوا ردة فعلها عيذها بالله من يوم جبنا طاريها وهي ملتفته ( والله اللي مهيب البربري لو تسب فيه وتحلته بالحصى مافيه أمل يرفع راسه ) وبما ان اغلب النباتات تتميز باللون الاخضر واللي تلقون فيها شوي صفار هذي اكيد يا منقطع عنها الماء او طاقتها الشمس او انها حاطه روج اصفر ماعاد الا هي ترا

والحمدلله الحين الارض باديها الخضار واحسن شي للجسم حاليا هو هالاعشاب اللي تطلع عقب المطر من البسباس والبقرا <== ما تنبت الا بشقرا والحميض  وغيرها من انواع النباتات هذا غير اللي ناكله ما درينا عنه عموما انا يامحاتسيكم اذا طحت لي في ربيع ما عني وعن الدبغ من جد ما اقدر امسك نفسي اجلس على ركبي واغز راسي واقعد افرم <== مايصف عنده البربري عاد انسى نفسي مع الاكل واقعد احصد  بكل مااوتيت من قوه وما يردني الا حصاة طارفه والا رجل بعير قاعد يفنك واصعب موقف واجهني وانا ارعى اني دخلت مزرعه  وانا لاهي مع الاكل ولاانتبهت وما دريت الا هاك  اللي رادني  واثره ثور يروع وشافني قباله وويقعد يلحسني ياوالله البلشه وش يبي ذا

 هو وقرونه واتلمس في مخباة صروالي كود القى سكين اطعنه وما لقيت وانا آخذ لي قحشة تراب واكبها في وجهه <== متأثر بمستر فوجي اذا كب ملح  على وجه سنوكا :) واخربش عيونه الين فكنى وانحاش نعنبوا بليسه عليه لسان عرض لستك الكفر  يمسح به وجهي كله في لحسة وحده ورجعت لربعي وعلمتهم وصاقوا علي لدرجه انهم كل ماطلعنا للبر يربطوني في اقرب طلحة ويقولون فكنا من شرك يكفيك اللي حولك <== يعض الحبل من القهر ..اذكر مره من المرات جبت لربعي عشبه غريبه شوي وقعدت آكل منها قدامهم ولا تقولون ياكل سنكرس وانهبل واحد منهم وقام وخنقني وهو يقول : طلعها طلعها لا تبلعها انت ووجهك وانا انهبل وش فيك وش فيك قال هذي عشبة يسمونها شجرة القامه وانا انهبل وشوووووووو لا عاد قل قسم قال والله صز وانا الفظها واقعد احط اصبعي في حلقي كود اطرش وما طلع شي واقعد ضايق صدري ماعاد اشتهي شي كني واحد

 مقروص ياشباب ودوني غسيل معده قاعدين تفرجون علي وانا امووووووت وآآآآآآآآآآآآآآآع  وضاق صدري ورحت بعيد وقلت بموت بعيد عشان ما تتأثرون وهم فالينها بلوت ولا همهم وانا رايح لقيت هاك البدوي اللي يرعى نياقه شافني الحالي ووقفني وش فيك ياولدي قلت السالفه هيك وهيك قعد يضحك قال وانت صدقت هم يسمونها تسذا . طيب انت تخبر هاك الحشره المرنقطه ابيض واسود قلت ايه شبابيه صح قال وش شبابيه . اقول لك حشرررة قلت ايه الزبدة قال هذي طال عمرك يسمونها مشاطة القامه بذمتك القامه لها شعر ؟ والا هي معها مشط ؟ او مسفع او حتى شباصه ؟ كلها حكالات و  خرابيط اولين بس لا يضيق صدرك وانا ابوك قلت يعني ماعلي خوف ان شاء الله  وابقعد ارعى مثل غنمك وبعارينك قال ماعليك خوف ودامك راعي عشب وربيع خذ لك هالطاسه واشرب منها تغسل بطنك ومنتب شايفن شر واقعب له حليب هالنياق لين طلع مع اذاني ورجعت لربعي ومعي العشبه نفسها حقت القامه وانا اقعد آكل منها عناد <== يلحسها ولا كون زون كخخخخخ وشافوني اعاند قالوا وقع لنا على ابراء ذمه ترا مالنا دخل فيك لو تفطس والا يجيك تسمم والحقيقه هم مايحبون نبات الربيع ولا يتسلون به اكثر شي يسوونه يجيبون معهم حزمة كراث ويفلونها على البساط وخذ ياجرش واحد منهم جايب عصير كراث وحاطه في جيك منهل ( آبوك يا كوكتيل ماما نوره ) وبصراحه انا دخت مع هالعشبه الكراثيه الغريبه هذا غير اني يامحاتسيكم متغلغل في أعماق الأعشاب وخبير فيها لذلك انا اعتبر الكراث هالعشبه النفاثه اعظم اختراع وجد على سطح البراري لأنها لها قدرات كثيرة منها انها فيها سحر غريب تخليك تنجذب معها وتحبها وتعطيك طاقه للحتسي والهذر بعذر الحريم والعجز اذا جلسن يسولفن وعندهن هالعشبه تقضي العصريه مادروا عنها ، وايضا فيها قدره كبيره على توزيع عصارة المعده بشكل ديناميكي متوازن يحسسنا بالتغره المريبه المنبعثه من أعماق الحلق بعطر حلو انسيابي يعكس لكل من يشمه مدى الذوق النباتي لصاحب الخشه والتغره وفيها ميزه مهمه كل واحد ياكلها ويلوكها<== يمديكم على يلوكها في اثمه يجيه شعورلذيذ طويل الأجل وشعور يجبره على مواصله الدعم الكراثي وزرعه في خلايا الجلسه واحسن شي للكراث هو انك تحزمه في جريده او سماط مكتوب عليه صحه وهنا عشان يحتفظ بفوائده ويمنع منعا باتا استضافته <== يعطونه مساحة خمسين ميجا :)  في الخياش والا ترا من ريحته بتنحاش وبناء على ماذكر أعلاه سيتم قريبا توزيع كميه من القات الكراثي الطبيعي فعلى من يجد في نفسه الرغبه في الاجترار بتلك العشبه الفريده فليراجع أقرب محل للخضره ويمدحون  سوق حليوه  ويمنع منعا باتا اصطحاب خلاطات مولينكس لضمان عدم الغش او التلاعب باضافة محلول الماء الى تلك العشبه الغراميه وبيني وبينكم جاني تلفون من ربعي يبون يطلعون يالله اشوفكم على خيررررر الحق على الطيب ياولد العططططططططططططه

  ==============