*  احيانا يكون ارتفاع سعر الشي  خيره  مانعرف قيمته الا بعدين  مثلا الرز الحين صاروا الناس  ياخذون منه قياس يكفيهم  ولو طاحت حبه رز وقت تغسيله  لقطوها ورجعوها من زود التقصي يعني صار الواحد  ياخذ على قد حاجته بعيد عن البذخ واللي مالوش لزمه   وعندكم بعد  ارتفاع راتب الشغاله خلانا نقول  كود يتركون استقدامهن  ماجانا منهن الا البلاوي والنحشات والسحر والغثا  غير ان كل بنات هالوقت  صارن اتكاليات  وماعاد يعرفن يسنعن شي بحكم ان اغلب البيوت فيهن شغالات  وصارن ( بنيات ) هالزمن فيهن عجز مهوب طبيعي ماغير متسدحات عند التلفزيون  وهاتي ياميري  وجيبي ياميري  واذا راحت لبيت زوجها بالمستقبل  تجيها غلقه لا شافت المطبخ والضحيه الزوج الجوعان  اللي بتصرخ  بوجهه : والله ياعيون ابوي  اني ما اعرف اصلح  الا بيض عيون   وان كثرت  قامت وفوحت  مويه حاره عشان تصبها  على الاندومي  وجايز لك والا دق على المطعم .

 * ما اظن فيه اشاعة تنافس إشاعة الإجازة  في سرعتها  وفي سهولتها  وفي وصولها للمتلقي ودخولها لدمجته بكل انسيابيه حاملة معها كل ارهاصات ( الفخيخ ) وتكبير الوساده  وكل تباشير ( الختات ) يعني شي يقهرني الحين بدل ما نتباشر بالانجازات صرنا  نتباشر بالإجازات  تخيلوا يومين بس  كافيه انها تسبب ( تخمه ) لمعدة  الحجوزات    وصرنا نردد  على طريقة شعبولا  اهي قمة الاوبك قتنا  وقابت معها اجازتنا  واهي كترت الختات   وكترت  البعزئه )  وهييييييييه

*  مدري ليش تكون اكثر اللحظات اللي يداعب فيها النوم  جفوننا وتحلا لنا غطته  هي لا صرنا في الفصل والمدرس يشرح  وهالحاله تزيد لا صار الواحد منجطل  بالبيت  يناظر   فلم   واذكر  هاك الوقت ايام المصارعه الحره  اللي  كانت حزتها آخر الليل  كانت بالنسبه لنا متاخره   حيث ان الواحد لا طقت  الساعه وحده  اشتغلن صفارات الانذار حقات النوم   وتصير الدعوى مصارعة نوم  وعسى الواحد  يلحق على الحكم  وهو يعد الثالثه  لكن الحين تغير الوضع  لأنه مع مع كثرة الانجطالات قدام المسلسلات اتحدى اي واحد  ( يفخ ) وهو يناظر مسلسل خليجي  والسبب انه كل مابدت عيونه تغفي يطلع لك الفنان بصرخه والا تطلع الفنانه بصيحه  وتتبعها  برزحة باب ( طخ )  وهو مايقصر يتبعها بفحطة موتر حاجات تخليك تتاكد فعلا انك  مش هتئدر تغمض عينيك ... وترقد .