يقولون ان الرسام بيكاسو هو اول من رسم الحمامه كرمز للسلام ، وهالشي خلاني اجزم وانا مغمض عيوني الكحيلة انه كان عنده ذاك الوقت عشة حمام في سطح بيتهم وانه كل عصر يطلع يشيّك عليهن  ويتفقد احوالهن ويطيرهن ويصفق لهن  ويدلع  في البسابيس  بريشهن الخفيف اللي يذكرني بلحية باباي ( الغانمه )  ويبيع من هالحمام القطيفي اللي يقلب في العشه وعلى اول صفقه يعني الحمامه هناك بدل ماتقول ( رئصني ياقدع ) تقول ( سئفلي  ياقدع ).

 وبالقرب من صحن المويه المذاب فيه حبيبات السكر لجذب اكبر عدد من الحمام  الطفشان من راعيه   هناك تقبع ( اروح زعتر على تقبع ) لوحته المصون وأدوات  الرسم حقاته وذات يوم انكسرت ريشة الرسم وهو ما كمّل الرسمه ، ومن مبدأ من له حيله فليحتال وبعد ما نسّف يدينه قائلا ( وش السوات يولد )   جت  بدمجة  خوينا بيكاسو فكره ماتخُرش الميّه  وهالشي طبعا  بعد ماطلعت  فوق راسه  لمبة سهاريه تعبيرا عن الفكره  راح لحمامه كانت منجطله في عشها عند فراختها يعني ( نفاسيه )  وقبل مايجونها الزواوير  قام ونتف منها ريشه على حين غفله  وكمل الرسمه حقته وخلاها بالاخير رمز للسلام  كرد للجميل على مساعدتها وفزعتها له في اكمال لوحته الثمينه  بعدها كانت بينهم الفه ومحبه حتى انها ( انتي يالحمامه ) سمّت واحد من عيالها اسم ( بسباسو ) عشان يكون قريب من اسم بيكاسو وصارت توقع على كتفه كل ماجا يرسم ( الشكوى لله متوحمه بصقر) . وتطورت العلاقه وصارت تقط معه بالرسمه  ماغير تغط جناحها  باحد الالوان  وتشخمط رايحه جايه  تقولون  باكستاني يليص جدار  وكلها كم يوم و ازدهرت لوحاته واشتهرت حتى انه باع كل العشه بعد ما كسب ذهب  من ورا اللوحات  وترك هالحمامه وعيالها يعيشون معه باقي حياته في سلام ورخاء   وتحول  بيكاسو من بياع حمام وبسابيس  الى اشهر رسام بالعالم ولوحاته تباع بالهبل بس السؤال اللي قاهرني لو كان في وقت بيكاسو  مرض انفلونزا الطيور  واجتاح عشته المصون تتوقعون وقتها انه بيدج ويبي يقشر بطاطس في سطح بيتهم  ؟