|
(( ون تشكن برجر لحم بليززز )) من ضمن الطلعات والصيحات اللي لاحظناها في اسلوب الكثير من الشباب هو خلط ملاعق من المفردات الإنجليزية في طريقة كلامهم حتى لو كانت ثقافتهم من جنبها واذا سالت واحد منهم وقلت شكلك تفت عنجليزي قال ايييه افا عليك واذا تكلم ماودك الا تمسك بطنك قولت ليتك ساكت واغلبهم لا حفظ له كم كلمه حسب نفسه بلبل محد قده وقام ينشب في خلق الله وحقين المحلات وهذولي دايم يكونون ضحية كتاب الانجليزيه في اسبوع لعب في حسبتهم دايم اللي يقراه يطلع لك من بكره بمحادثات الجمل مره واحد خمته عند ربعه وقال لواحد : بالانجليزي : اين استطيع الوصول الى ميدان ترافلجار ) انهبل زميله وصرخ يخوي انت جاي تلعب مونوبولي روقنا يشيخ وشو ترافلجاره حدك وجار ومن فوقك والمشكله ما كفاه هالشرشحه كمل ثانيه بالعربي والانجليزي : هل عندكم شقه للإيجار ؟ ويقوم عليه واحد منهم ويمسكه مع غالوقته هالحين ماملت عينك استراحتنا تبي تستاجر شقه رح قل هالكلام لحقين العقار ولا تم نشوفك وماهدا الوضع لين طلع الكتاب من مخباته ووراهم نص التدريب واللي على قد حاله ماغير تسمع منه كلمه ( اوكي ؟ ) يجيب طاريها عشرين مره في السالفه الوحده وانت كل ماقال اوكي هزيت راسك يعني ايه كمل عموما خلوني اسولف لكم عن بعض المواقف اللي صارت من جراء ( اتشقق على جراء ) التميلح اللغوي والخطمات اللي مدري وش تبي هذولي اثنين جالسين على طاوله في احد المطاعم جاهم الطلب ويوم شمروا عن سواعدهم قام الاول ومسك كيسة المايونيز وقعد يقرا كنه يتهجى : ( مايووونييييزززز قام خويه ورد عليه وهو يعرش : مآي نيمززززززز از محمد وهذا واحد كان في وسط درس يتكلم عن الطب الشعبي والاعشاب وفوايدهن وطلب من كل واحد يجيب وصفه معينه فيها فايده قام اخينا في الله ورفع اصبعه وبعد ماطلب منه الاستاذ ان يجاوب قال : ( بلاك بوينت ) يقصد الحبة السوداء لا شاطر عاد التميلح يكثر عند الاهل عشان الواحد يضمن محد متلقط عليه وانهم ما راح يدرون وش يقول يجيك اول مايدخل على جدته :( هاي قراند مذر ) عاد ضعيفه هالعجوز مفهيه ومالها الا ترد عليه اي والله شابيني الذر اكيد انه يحسبني حتة سكر والا هذي بنت صغيره طفرتن بالإنجليزي قالت لامها بصوت معصّب : يمه أبي ( فود ) يعني طعام صرخت امها بوجهها وقالت : والله يابنيتي ماعندنا فول شوفي عندك الجبن والخبز دبري عمرتس ولا قطع قلبي اكثر شي الا هاك الواحد والواحد الله في سماه العالي دخل محل وجبات راقي وقال ( ون تشكن برجر لحم بليز ) عاد وقتها تخيلوا ردة فعل الكاشير كشر بوجهه وطارت عيونه لين تدارك الوضع ولا انسى ابو الشباب اللي ضاقت عليه الوسيعة في احد الامور اللي ضاق صدره منها وقال بعد تنهيده طويله وتحريك راس يمين ويسار ايييه : ( بيوبل آند بيوبل ) يعني ناس وناس لا شاطرررررررر عاد ان جينا لوصف الأمور الشاعريه ومحاولة صبغها ببهارات غربيه لقينا خوينا يخطم علينا بخطمه من النوع المضحك يوم قال ذات حزه ( آي لايك يو تيلي متش ) . وشو تيلي متشه ؟ مشكله والله هذي ضريبة اللي ما يتابع التلفزيون الا وعنده صحن فول وكيسة فشار . لكن كل هذا يهون بصراحه عند المفردات السخيفه اللي يقتبسونها بالافلام وتلقى الواحد يدوّر ادنى فرصه عشان يذبها عليك وقبل اختم كلامي تذكرت ذاك اللي يناظر مباراة ومتحمس معها مره يوم ضاعت الهجمه صرخ بالانجليزي : ( شت ) رد اللي عنده وقال : بدري ؟ توك تستوعب هذا له ساعه شايت ...
|
