امصل شي عندي هو المخوش اللي تجي في اليدين والوجه يعني فشيله ان الواحد يسالك ويقول  :  انت متهاوش مع قطو   هالموقف حصل لي  مره من المرات وانا داخل الحلاق  طبعا اول  ما خشيت المحل كان العامل منسدح على الكنبه  وينتف في شاربه  وفز من مكانه  وقال نعيما الظاهر ما يعرف الا هي  ويوم جلست على الكرسي واسمع بولولجووللالالا بوبوبوبججج طقطق بوبولولالاجج  اثره مشغل شريط  ابو هنوده  كنه ما يعرف يشتغل الا بالطقطقه وما طلعت من عنده الا وخدودي تسورب دم  هو يهز وانا اهز وهالموس ماقصر قعد يشكشك على المساحه الحمرا اللي في وجنتاي  عاد كل من شافني طالع سالني سؤال المخش عاد بذمتكم مهيب حسوفه هالجروح والمخوش على هالخديدات   ايه هيّن 

ماعلينا مهوب هذا موضوعي بس بيكون له قاسم مشترك في السالفه بتفهمونه من خلال سياق الكلام ( انحش يا سياق ) 

نجي لسالفة  القطو  ومدى تفاعله مع احداث 11 سبتمبر ؟ عفوا احداث الحياة المحفوفه بالمخاطر والاثاره  والمواء  الذي يشابه العواء

القطاوه تنقسم الى اقسام  كثيره فيه شي اسمه قطو مطابخ ومطاعم وهذا رازقه الله بحظ يفتّح قواطي التونه  واكيد امه داعيه له قبل تتزوج واحدن ثاني هالقطو من النوع اللي مربّع ومتعافي وطافرته النعمه طبعا مقر اقامته عند باب المطعم يتحكك في الداخل والطالع يذكرني ببعض العمال اللي يجي بفيزه حلاق ونلقاه يبيع في محل عطور قدام الورود والزهور اللي تجي عنده وتدور ( هنيا له ) يحمد ربه غيره يرعا غنم  تلفحه الشمس ويصرمه البرد اما خوينا فهو  حده  يزكرت ويكدد قصيصته .  عموما قطو المطاعم  دايم تلقى في اثمه عود خلال واحيانا خوصه  في حالة وجود نخله جماليه عند المدخل  ودايم تلقاه يالله يمشي بحكم كبر الدبه   لكن بعد ما حطوا لهم شارع اسمه شارع (  المواء مل )  يقلدون فيه شارع الحوامل  صارت اوزانهم  معقوله وانواع الترقيم  هناك  ما يرقمون الا بجناح  دجاجه والا ظهر سمكه ما عرشه راعيه J  لكن الشي اللي قاهرني  هو   قطو المطاعم ... يكون خشن والا ناعم ؟؟ يمكن يكون خشن عشان يضمن مركزه <== راس حربه  ويدافع عن لقبه ويمكن يكون ناعم بحكم ظروفه المعيشيه والبيئه الحلوه اللي هو قاعد يتمرغ فيها  لكن الله يهنيه  يبطي والله يلقى شي عقبي  J شوفوا تكفون وشلون طافرته النعمه  في احد اوقات الراحه قاعد يناظر قناة كات موفز لكن ما اقول الا يازينه في برميل المندي وخلوا عنكم  

وعلى طاري الدلع والتدليع والزكرته والتلميع  اذكر مره شفت في احد القنوات برنامج عن عمليه جراحيه  وماغير  هالممرضات جايبات جهدهن والغرفه كلها اجهزه وكمبيوترات واسلاك شابكينها في جسم المريض انا قلت هالعمليه الجراحيه شكلها لأحد المهمين عندهم والا كان ما يدهرون كذا وبعد ما خلصت العمليه  وجابوا المريض  بعدها والاه   قطوووووووو     نعنبوا  بليسكم حنا نوطيهن بالسيارات ونرجمهن بالحصى وبالزبيريات وانتم   تشبكون فيهن الاجهزه الطبيه من الخوف احلالات من يشبك عليهم  هم وقطاوتهم 

وفيه نوع من القطاوه  على نياته ماغير يطارد ويدوّر رزقه مره في الزبايل ومره في الشوارع ومره يصيد له جرداه تشبع رغبته ومره يطيح في سماط ناطلينه ناس ما كملوا عشاهم ويلقى فيه عراش من بواقي الدجاج المشوي ومره يطيح في شغاله تكب الزباله بدون ما تتغطى عنه ولا شي ولا بينهم اي حاجز  ويكفي انه يسمع منها كلمة ( اوووووو سويتي كات تيك يور لنش )   ويمكن تتهور وتمسح على رقبته وظهره   سرا ليلك يبو بس استر ما واجهك وعلى طاري ( بس ) خذوا هالنكته ( اربعة فيران يلعبون بلوت قال واحد منهم الاول قال الثاني (بسّ) والا يوم تناحشوووووو كلهم ماعاد بقي احد 

والنوع الثالث من القطاوه هن قطاوة  الحواري وهذولي ياعزتي لهم انواع الهواش والتسكع والسربته كل واحد منهم حاجز له برميل ومخليه زي الاستراحه له يجمّع فيه شله فاسده وخذ سهر الين الصبح والمشكله ماهمّهم الجيران ولا شي تسمع الهواش ( وعووعو وآآآآوووو ) وياردي حظ اللي ينام في الحوش عز الله بينهبل وبيتكدر نومه 

اذكر مره اثنين من هالقطاوه  قعدن يتهاوشن مدري يترادن بينهن ويسبن بعض او شي ثاني المهم قفلت معي وقمت من نومي وخذت الزبيريه وادور الصوت وينه والقاهم فوق السور واهش يمين يسار ويتفرقن وما امداني احط راسي الا ويجتمعمن  وآآآوعو  . يلعن ابوك قطو والله ان ماعقلت انت وياه لطلع الشوزن قلتها والا ماقلتها وتقوم امي على هالصوت وش فيك يبو هارون عسى منتب تحلم والا شي الله يطامنك باسمه وراحت تجيب لي عصير ليمون على طريقة المسلسلات المصريه  وشوي واسمع مووايل القطاوه واقمز من القهر والقط الشوزن وادرق ( امشي على اطراف اصابعي ) واركد على راس واحدن منهن وطعععععع والاه مسلفط على اذانه وينحاش خويه يلطم خدوده واسمعه يقول ( الحئئئئئئوني

قطيوان مات ) وتجتمع شلة قطاوه ان كانهم اكثر من 60 قطو وقطوه فهم شويين وتمتلي بيتنا قطاوه وامي تنحاش وتصك على روحها وانا اللي كلتها الشوزن معي وخويهم طايح غرقان في دمه وهم يناظروني شوي ثم يناظرون قطيوان  وهم محاصريني مع كل جهه اللي مطلع مخالبه واللي مطلع سنونه واللي في يده عظم ( فخذ دجاجه ) وناحته على شكل خنجر  واللي رابط راسه مسوي ( نينجا قطاوه) واللي قاعد يعوي على باله بيخوفني وتجي لحظه الصفر ويقمزون علي قمزة قطو واحد والمشكله ماجبت الا رصاصه وحده كان اضرب في المليان  واسدحهم مثل سدحة قطيوان  ويطبون علي لين تغبيت ماعاد انشاف  وخذ يا تمشيخ وتجريح مع وجهي وخدودي وتعضيض مع يديني وامي سمعتني اصوت ابي احد يساعدني جت يمي  تركض ومعها معصاد الجريش يوم شافت الدعوى خليطي قالت وجع شكلك طالب مساعدة الجمهور هذوليهم كلهم جايين يساعدونك اجل خلهم يعرشووووووووونك قصدي ينفعووووونك L