كل عام وانتم بخير اقولها لكم  مع اشراقة صباح العيد المبهج  هالعيد اللي للأسف بدا يفقد فرقعته في قلوبنا وماعاد نشوف  في ساحته الا ناس كاشخه وثياب نظيفه وشمغ يالله تنسفط من النشا في الوقت اللي  تمتلي نبضات الاغلبية فيهم بكل شي يسد نفسك عن التفاهم  مع الصحون المتناثره على مدى البصر هالشي لاحظته على مدى  دراسات سنويه  عيديه ولقيت ان مستوى الانحدار والتذبذب في الابتسامه يزيد في نضوبه وتكشيره والنفوس بدت تشين من تالي لدرجه اني حرمت اتعيد مع جموع الناس وفضلت اني القط حافظه من رز الوالدة الله يسلمها  وزمزمية شاهي واروح لأقرب طلحه واتعيد هناك انا والقطاوه اللي تهيم على وجهها في البراري بحثا عن طير صدم في نخله او حمامه  جتها سكته وجت مجاوبه على منقارها  وفضلت استمتع بالأجواء الهادية والنسمات العليلة  وقعدت اسجل بعض من الحاجات اللي انتشرت   في اعيادنا واغلبها ينصب في الهوشات بين الشباب  يعني نلقى صباحية العيد عالم تهجول بسياراتها وتهيم على خششها المليانه بحبيبات الرز ( ماصبر ولا يغسل خشته ) وتبدا سلسلة الدوران  والمحارش وهذا يصدم هذا في احد اللفات والسبب انه قاعد يزين تشخيصته وهو يسوق وهذا يوقف الثاني ويقول ليش تقلدني يوم حطيت نسافات برتقاليه  وفي الجهه الثانيه من مكان العيد فيه مجموعه عند المغاسل تتراشق بعبارات بذيئة ويالله يفكون بينهم وبعد التحري عن اساس المشكله لقينا واحد من الشباب  يقول ليش يسلم علي بعد ماغسلت وتملطخت يدي بالزيوت اما خويه الشقي  فقد تم الامساك به وهو يمسح يديه في شماغ احد الضحايا بدون مايدري ويوم هاوشوه حلف انه يحسبها فوطه  لأن راعيها فاصخها ومعلقها من زود حرصه حتى فرحة الصغار اللي فيها معنى العيد  واشراقته  ماعاد نشوفها هالوقت  وصار الواحد يتذكر يوم البزر يعد حبات الشروخه قبل ليلة العيد تقل جنيهات ذهب  واذا اصبح لقى من يعطيه ريال ويساله من انت ولده وياشطرك وياملحك  وحاجات ترفع المعنويات  الحين  الرجال لا وافاه بزر كاشخ مروشته امه وملبسته وطالعن كنه عصفور يقطر براءه  وقف قدامه وقال له : اصبر لين اتعداك ترا ان اطلقت شي من اللي معك باتوطا ببطنك  لحد يقول الاطفال لهم شقاوتهم  صدقوني لو جا يمه الواحد ودهن سيره بريال او  كلمه زينه ان يختشي على دمه وتتبدل نيته للأحسن  والا يصادفك طفل على عتبة بيتهم  يصيح وتسأله وش فيك يرد ويقول  ابوي طلع ولا أخذني  معه حسبي الله عليك  من ابو  هالحين رايحن  لأبعد الناس وتاركن اقربهم يحس بالغربه في صباحات الارهاص ( حلوه الارهاص  )  مالكم بالطويلة هالسنه ان شاء الله  بتفقدني  قطاوه البر  لأني قررت  اني احب راس امي  واعايدها واقدع معها واروح اخمد يمكن احلم  ب ( عيد ) يستحق نلبس له شي ( جديد ) وعلى طاري العيد واعلان الخبر  باختم كلامي بسالفه طريفة هذولي عايله في آخر يوم من رمضان سمعوا في الرادو ( ابوهم شايب ) ان بكره العيد  قام جا يمهم ابوهم و طفّى كل شي قال ارقدوا  خلاص بكره عيد يوم جا الصبح ويكشخون كشخه ويطلعون العيال مع ابوهم مزكرتين لمصلى العيد وللأسف  مالقوا احد طالع والمكان  فاضي قال ابوهم اكيد انهم بيصلون العيد في الجامع راحو الجامع  لقوه نفس الشي  فاضي  صادفهم واحد وسألوه ضحك عليهم وقال لا اليوم مكمل لرمضان وش السالفة يولد يمين يسار صاروا سامعين الخبر في اذاعه أحد الدول العربية  ... وعساكم من عواده