تبون الصز العنوان بغى يجي صز بس الله ستر وسالفتي مهنا هاك البعد عن اللي يستضيفهم فيصلوه القاسم في الاتجاه المعاكس والمشاكس و( كعبول ) وآنسه رفيعة.. المهم  الزبده وعلى طاري الزبده فيه نكته حلوه يقولك فيه واحد طب على بقاله وسرق اللي فيها ونحاش وجت الشرطه تشوف الدعوى وشي ، دخل الملازم على العامل وقال وش صار قال العامل هذا فيه رز  في سرق هذا في لبن في سرق هذا في بسكوت في سرق  وصاق عليه الملازم وقال المهم عطنا الزبده ؟ قال العامل  حتى زبده في سرق  :):)  يووووه  انا طلعت على الردميه  وضيعت الموضوع  ماعلينا المهم رحت هاك اليوم للحلاق وطبعا احسن الحلاقين عندهم زحمه وانا واحد مافيني حيل اجلس احفظ المجلات عشان يقضون  ورحت  ادوّر حلاق فاضي الين لقيته والمثل يقول لو فيه خير ما خلاه الطير والشكوى لله  دخلت عليه وجلست على الكرسي ( اجل ابجلس على البلاط )  وقلت له دقن صديق انا في عزيمه  ولازم حلاقه كويس ( ابي احرصه من زين الطبايع ) جاب هاك الفرشه وقام  يفرك يمين ويسار لوه يصبغ جدار كان خلص  وقعد يحلّق وانا يالله انفس اخاف اتحرك  ويجيني ( زلط ) او جرح الرجال تنافظ يديه ويوم  خلص من الحلاقه  قال لي : سديق هذا وجه يبغى صنفره ؟؟ ويييين  ياعمي وش قالوا لك اصابع بطاريه والا بليتين لاذع ؟  ( قال هذا في هبّ أسود )   والله مشكله  قلت  يمكن هو ابخص ويشوف شي منيب اشوفه انا،  وسالته طيب هذا كم وقت ؟  قال  خمسه دقيقه بس . قلت تمام  يالله  ادهر  ويسدح  راسي على المرتبه ويجيب هاك الكريم ويملاه في يده ويقعد يفرك في خدودي ويفرك  وذا الكريم فيه حبيبات خشنه كنه معه تراب ويجيب هاك الكريم الثاني ويفرك  به الين امتلى وجهي وراح  وجلس على الكنب عشان مفعوله يبدا  وانا شكلي غلط والثانيه عندي كنها دقيقه واخاف يدخل احد اعرفه ثم  ( يغفّل علي ضحك ) ويمسكها علي  وبعذره والله ما نقصني الا شرايح خيار يحطها في وجهي وتكمل وقلت سديق( سورعه) وقام يمي  وقعد يفرك ثانيه وعنده هنود  يضحكون مدري ليش  المهم قرب وجهي للمغسله وخذ يا تغسيل قسم بالله تقولون يغسل خشة بزر عقب ملاطيخ الكاكاو وانا اسال نفسي وش سويت الله لا يعيدها من صنفره ويوم  خلص قعد ينشف وجهي بالمناديل ويمسحه ووراني صورت وجهي في منظره معه وقال شوف كيف الهين ؟  وبيني وبينكم  ماتغير شي .  لواني مغسل وجهي بالصابون كان احسن وجاملته ضعيّف وقلت اوووو  كويس مررره الهين فايده  سوا سوا قمراء  ( تراه يبي يفهم  قمراء )  وخذ له كريم مرطب وقعد يدهن وجهي به وانا مغمض طبعا عشان عيوني وقعدت مغمض 0 جازت لي التغميضه )  انسجمت معها الين يقولي خلاص ( نائيماً ) ومادريت الا وهاللي معه يدهن به براطمي ؟؟ قلت يمكن انه ( لا بيللو) والا شي مافتحت عيوني  خليته على راحته  ويوم  قضى قال ( كلاس ) شوف الحين  ويوم  فتحت عيوني والا المصيبه شي ما صدقته ؟  براطمي صارن ( حمر )  صار الكابون  مبودرني  ؟  ومبسوط  جايزله هوو وجهه وانا اثور عليه واخذ مناديل واقعد امسح خشتي اللي لو احبب بها جدران المحل امتلت ( تبويسات) واصوق عليه قلت له ايش هذا ( هذا هقّ هورمه) مافي رزّال  واعطيه فلوسه  وانا احنتم واطلع واللي يشوفني طالع عقب الصنفره والعمليه يقول هذا  عنده مقابله في برنامج الاتجاه المعاكس او لقاء مع  عماد الدين اديب   ،  وتبون الصز  الى الحين وباقي قطعيات حمر في  خشتي  ما طاع يروح  ذا اللي هو حاط  او يخف الظاهر ان خشتي صارت تبي صنفره بعد مهوب  وجهي وبس  :)