انا بصراحة من الناس اللي طاروا في عجّة فلم الرجل الأخضر يوم كان يجي في ( تلفزيوننا العزيز ) وكنت اتحمس مره للفلم يعني بدون مبالغة احتريه قبل لا يبدا بربع ساعه اتطعم بها الين يبدا لكن اذا وصلت بداية الفلم  من حبي له تلقوني ما ( أغضي ) الا ثلاث مرات بس في الحلقة كلها وانواع الحماس ، واناظره وانا منسدح على بطني ( وش اسوي كلمة منبطح قويه ) ورجليني ( تطقطق على الأرض ) بالتناوب ومرافقي على الأرض واليدين حاطهن على خدودي ( خدود ممشقه ) من كثر الصياح حتى ان خدودي امتسّن  وحول ما يدخلن في عيوني من التركّي ( عاد من ثقل الراس )  المهم دايم تكون احسن اللحظات في الحلقه هي اذا جوك الشله وقاموا يتحرشون بالبطل وقفلوها معه  الين من  ( الصوقه ) قام يتحول الى الرجل الأخضر عقبها انبسط واقعد افرفش واضحك لأنه يجيني شعور بأن الحق يبي يرجع لأهله ( وش دخلها ) عاد اذا تحول وتشققت ثيابه وازرقت عيونه واخضرت ( تاقف عصيقيلاتي ) عن الحركه من الاثاره واستقعد على ( حيلي ) احوووول ( خابركم تروعون ) وعدتوا كلمة حيلي مرتين ويبدا يشلّخ فيهم ( وين صار حبحب ) ويكسمرهم ويفقّع وجيههم واذا خلص منهم راح بعيد عنهم  في غابه والا مكان فاضي وجلس فيه وشرب له عصير ليمون على قولة المصاريه يهدي الأعصاب وعقبها ترجع حالته الطبيعية وترجع معه ضيقة صدري لأني احس ان الفلم  خلاص يبي يخلّص وانا عاد ما أرضى بهالشي من يوم  انتهت الحلقه وانا يا محاكيكم اقوم كني مقروص واروح ادور الشر وما لقيت الا الخدامه واروح لها واتلقط عليها أي شي اهم شي اتنرفز واصوق ويوم  وصلت معي منها وانا اللي ( أصد ) عنها شوي بس واجيك راجع لها  ( باخ )  شعري ووجهي ببخاخ اخضر واطب عليها وانا اصرخ ( عآآآآآعوووووو )  ( حشا ذيب مهوب وحش )  وتنهبل الخدامه مني وزعقت وقالت : ( مافي كدا ) ( مافي أخدر ) يعني اخضر  بعذرها مسكينة مرتاعه واقوم اكسّر في البيالات واعفّج الطوفيريات وأرجف باب الفرن الين انخرع وتجيني القطوه الربوية حقتنا وانا ( انقشها ظفر ) والاها ناشبه في ( مروحة الشفط )  والخدامه تصارخ وتزاعق ( ماما كولو كراب )  ويوم طيّحت اللي في راسي  وانا أطلع من البيت ركض ومن شافني في الشارع استغرب ؟ توهم مخلصين مناظرين الفلم وما يدرون الا وهو  يوافيهم في الحاره ؟ ( ويييين ياعمّي ) عاد انا مشقق سروالي السنه  ( ومعرّم ) فنيلتي العلاق والعضيدات والفخيذات لكم عليهن صحيح مهنا هاك العضلات بس أهم شي النشاط  ( مرّه مقطعني النشاط )  وانا انحاش عنهم عقب ما صاعوني  بالحصى هالمبزره واصد عنهم في احد هالنخيل  ( واتسنّد ) على هاك ( البرحيّه ) ابي كود ارجع لحالتي الطبيعية وماش  ما تغير شي يا ولد ؟  وكلها شوي وما دريت الا بهاك  العمّال حقين المزرعة ومعهم صعيدي جا لمي وقال لي  : ( دهدي انتا بتعمل ايه يله )  ( ومين اللي عامل فيك  كده)   قلت له يرجال  نلعب  ( حبشه ) ومتوزي عنهم  وسألني عن البخاخ الاخضر  وصرفته اني اموّه عليهم عشان يحسبوني ( شجره )  ( مقطعتني الذهانه ) وشافني يالله أرد النفس من التعب ( ماش لياقه ) وراح دقيقة وجاب لي كاس ليمون سبحان الله (شفتوا اشلون) وانتم خابرين بعد انهم يقدّرون الليمون  وخاصه اذا  ( فزّ) الواحد مرتاع من الحلم  وانا اللي ( اجغمه ) في نفس واحد، عاد نويت ارجع للبيت  بس شكلي غلط  واروح ابي اغسل وجهي من هالبخاخ  ومالقيت احسن شي الا ( الديزل ) حق المكينه  وامحك به وجهي  واجيك  راجع للبيت ويوم دخلت  والى الوالده تحتريني  معها ( عصى مكنسه ) في يد  و( معصاد الجريش ) في اليد الاخرى والخدامة بعد ما قصرت  في يمينها ( مقلى ) ويسارها فيه ( ملاس )  وعينك ما تشوف الا العصافير اللي تحوم فوق راسي ( وتصوصي وانا اصوصي معها )  من الوجع وانواع الدبغ والطقاق وانا (اوعوع والا ما اوعوع)  ابي كود يخافون اني اتحول عليهم  لكن ماش ما دريت الا والمقلى في خشتي والخدامه بعد من زين الطبايع ترد علي وتقول ( مافي وع وع  الحين في روح .. تطلع ) روه يالله   ( خلي رجل أخدر ينفع ) .....