حـــــلاو  cow

      هالموضوع اللي انا لافطن به قدامكم موضوع على درجه ( عتبه ) كبيرة من الأهمية لأنه له طعم  خاص وله نكهه لا تقاوم مغري الى درجة الذوبان  ولذيذ الى درجة الإدمان وممتع الى آخر قرطاسه ....  انه  حلآو البــقر   واللي ما يعرفه او اول مرة يسمع به  هذي صورة كرتونه فوق ماله عذر اكيد  يبي يصير قد  شراه او  قد رآه  ويتواجد هذا المنتج  في رفوف البقالات وخاصه الصغيرات منهن والطارفات وتلقاه بكثره في صناديق العجز ومخابيهن لكن للأسف الشديد الشركه الراعيه ( صارن غنم مهنب حلاو )  والمصنّعه له قلبوا نطفته وغيروا شكله الخارجي ( نوعا ما ) والداخلي  ( مهوب نوعا ما ) لأن شكله له ذكرى ( فيروز )  كبيرة في عيوننا وكانت قرطاسة الحلاوه  مبطي اقوى من هالحين وكانت الحلاوه اللي في وسطه مستطيله والحين صارت مربعه واكيد بعضكم  يبي يقول : ( طيب وش فرقت مربعه والا مستطيله  )  وهنا اقول له ان فيه فرق مهم  وهو  انها يوم  كانت مستطيله كان الواحد منا ياكلها على دفعتين  ويتطعم بها والحين على طول تختفي في اثمك وتروح في غمضة عين وعشان كذا لاحظوا انهم حاطين بقرتين على الكرتون بمعنى ان  كل قضمه تساوي بقره  بكل ماتحويه من زبده وقشطه وحليب واذكر ايام العيد والشروط كان الواحد مايصبراذا شاف مع شروطه حلاوه بقر يشق الكيسه ويتفاهم  معها لكن الله يهدي بعض الناس يعطونك  من هالحلاو اللي قاعدن عندهم 10 سنين ما وكل ؟ واذا قرضت الحلاوه تكسرت سنونك من قساوتها  ، ومن الأشياء اللي تمتلكها هذي الحلاوه هي انك ما تقدر تقاوم  لذتها وكم مرة من العجله ضفيت الحلاوة بقرطاستها لأن بعضهن تنشب فيه القرطاسه  وشغله اقعد اقشعها وأشيلها من الحلاوه  ومالي الا اني اغمض عيوني وآكلها بحل يالبقره  ( وبعدين كلنا بقر نصلح مع بعض ( J