كل الحدايق اللي في ديرتي محيوسه وما تشجع لقضاء  وقت ممتع مع ثلاجة شاهي وشوي مكسرات ولا يهون بسكوت جلوكوز عشان الطاقه استخرت ذات حزه وقررت اني اروح  لندن منها اشطف حدايقهم واشوف هم مثلنا في تصميمهن والا يختلفون  شديت الرحال وتوكلت على الله ورحت هناك  اخذت معي في شنطتي بسكوت ابو ولد  ( لزوم أغط على الشاهي ) ويوم وصلت هناك ركبت التكسي وقلت له بليز ادعس  تو ذا هايد بارك ) جعله يبرك عليك بعير  هز راسه وكلها خمس دقايق والاه موقفني  عند المدخل حقها  عطيته جنيه استرليني عشانه مشغّل العداد ( لاعبن علي )  وحوّلت ووقفت اتأمل منظر الحديقه الجذاب بصراحه شي ما صدقته نعنبوا بليسهم مراجيح نظيفه ومريحه مهيب حقاتنا اللي رابطين  لك  كفر ددسن   طاقته الشمس ومتنحلّ بعد من زين الطبايع راعيه مهوب يدخل به الا عرض مع كل لفه هذا غير ان  نصف المراجيح مكسره والزحليقه عندهم تقصّر وانت تقول ناعمه وطويله تقعد خمس دقايق ما وصلت الارض  أما عندنا تلقى الزحليقه كنها مبشرة جبن كرافت  و لو يتزحلق عليها الواحد  انشق ثوبه او على الاقل ماقام منها الا ولعبه مونوبولي طابعتن  في مقفاه هذا غير انهم يقصون الشجر على الشكل اللي هم يبونه  ما تعوق معهم  تلقاهم حاطين لك شجره على شكل واحدن يتمغّط والا يتزلج  وحنا العامل الهندي حق حديقتنا جلس يوم  كامل يبي يسوي الشجره على شكل مثلث  الين غدت كنها جبنه البقره الضاحكه ؟  ماعلينا قعدت اتمشى فيها وكان فيها عوايل وبحكم عاداتنا طلعت منها وانا ضايق صدري  على إني موافقن يوم العوايل عندهم   ووقفت وعند المدخل  احتريهن يروحن  وكل شوي يدخل شله من هالشباب   ويطلعون .. خيرررر ؟   انقهرت ووقّفت واحد منهم  جاي بيدخل  : هي مان  ستوب بليز . رد علي  وآآآي ؟  قلت له : ذير آر وومن انسايد  دونت قو  .. صرخ بوجهي  وقال : ( شرب يو مان ) ورجفني   الين رزحت في برميل الزباله حقهم  ومتدربي لين ردتني عجوز باسطه عند المدخل  اثرها تبيع بليلة على كم ( بيز)  على كم شباصه وجلست اتفرج  شوي على المقاضي حقاتها  وشريت منها ( بيز )  عن قولة ما شريت ونزّلت راسي بحب راسها تقديرا واحتراما  والا يوم  لزختني بالمهفه حقتها مع خشتي لين  تقاطرت سعابيلي :( وقامت من متسانها تبي تكمل علي وانا انحاش الظاهر انها تحسبني اتحرش بها من زينتس عاد انتي وجدايلتس اللي كنهن ذنب قطو يلعب به على جدار ))  طنشتها وناظرت الحديقه و شفت الدعوى خليطي وخربانه قلت اخربها  وش زودي  وادخل بالحديقه  ورحت لأقرب كرسي باستكشف الوضع واتليّن شوي المهم دخل واحد عمره صافقن 130 يعني بقي له  شوي وتقوم عليه <== يسمع يالبلوت  يمشي على عصاه اللي ماتعصاه ناحرن الكرسي اللي انا فيه عاد انا من الفضاوه قاعدن  افرم في هالعلوك ان كاني  مخلص في اثمي دسته فهي شويه لدرجه ان خشتي متتفخه المهم يوم  جا يجلس هالآدمي طق فيني عردز البثاره وطلعت العلك من اثمي وفرشته بيدي على مكانه  مثل العجينه لين غدا  العلك كنه خبزه على الكرسي <== شوي ويحط سمسم ابد ما تفرقونها عن تميس الافغاني راعي الفول   وجلس الشايب يناظر ويتمقل في ربوع الحديقه واشوفه مسكين  كل ماجا يزيّن جلسته او يتعدل ماقوى  كنّه مسمّر ويوم شفت العصا تطقطق الارض حطيت رجلي  ونحشت ورحت اجلس الحالي عند شجره هناك  على شكل ديناصور  تظللت تحت ذنبه وانسدحت شوي والاها جايتني بنت حمرا عطرا  : هاي   انا اختبصت لأن صروالي مع التسدح  وصل لين  ركبي تخبرون رايحن في صروال وزارة المعارف ذاك اللي منقّط وتحته سحّاب وضيّق خلقه (  مسوي برمودا  هع )  وشلون اجل لو ابطى وامي الله يهديها غاسلته بكلوركس له سنه مفتوح غطاه وناشرته في السطح عز الظهر الين شمر ومن  زين الطبايع  قاعد اتسدح بفنيله العلاق المشوخله  مسوي  موضه عندهم   المهم تواسيت وزينت لها متسات وجلست جنبي  وقالت : هاو ار يو  ؟ وحبيت استظرف عليها  قلت : كلينكس  قالت وآآت  ؟  قلت فآآآآآآآآآين  ردت علي وقالت : اجل امسح خشتك به  هع  استغربت ردها وسألتها انتي عربيه ؟ قالت لا تكسي خخخخ  ايه  عربيه  وعرفت انك  من الجماعه يوم  شفت عصيقلاتك وركبك المقحله ( عليها رشة البلد )  وقالت ان بيتها قريب ودايم تجي على  رجليها تغير جو   عاد عرّفتها على اسمي قلت معتس ابوهارون ويدلعوني بو هروني نايس تو ميت يو ماي فريندهوتلتني مع يدي  للمراجيح وقعدت انا وياها نتمرجح  وانا عاد جفسن شوي في اللعب متعود على البثاره هناك  ماطلع الصعارير اللي براسي الا مزحات عيال الحاره   قعدت ادفها في المرجيحه وكل مالها وتبعد عني مرتن ادفها بيديني ومرتن برجلي اقوى  وهي تصارخ  واحسبها تزاعق من الفرحه  ويوم رجعت لي دفيتها بكل ماعندي والا يوم  طمرت والاها ناشبتن في قلب الشجره  وآآآآآآع وآآآآآع  رحت لمها وتعذرت منها وطيبت خاطرها بكلمتين الين رضت وهي كلها رضوض   ورحت للشجره اواسي غصونها المايله واظف المتكسر منها  ويوم ناظرت حولي والا اللي بالحديقه مجتمعين  على شكل دائره وجا واحدن منهم  ومسكني مع يدي وقعد يهوش ويشّر على الشجرة عاد خويتي علمتني انه يبي غرامه على تخريبي لها  وهذا نظام عندهم  L قلت له خلاص بوصّي ولد خالي يشحن شجرة برسوبس ونركزها بدالها  ( ياسفا بها بيقعد الهايلكس بدون ظلال )  وش حيثهم يقلعونهن عندنا بداعي الحساسيه خلها كود  تنتشر فيهم هالحمران  المهم صكني بقسيمه تخريب وراح هالماخوذ عاد انا حاولت الطف الجو  وقلت للي مجتمعين ماودكم نلعب واحد طيش ( استغمايه ) وعلمتهم طريقتها  وقعدت اعد لين 20 والتفت مالقيت احد  رحت ادور ولقيت واحد مبوبز عند شجره واجيه مع وراه وارجفه والا يوم  تكرفس على وجهه عاد هو تقبّل الوضع يحسب الرجف من اصول اللعبه وجازت لي الدعوى  رحت ادور الثاني والاه مسوي روحه شجره رافع يده كنها غصن وفاتح خشته مدري ليش  جيت يمه معي عسيب ( ايه عندهم  نخل هناك عادي  تحصل في أكبر الحدايق ) ولشطته مع ظهره اين قام يناقز من قو الطقه ويوم شافوني اسوي بهم كذا تنحاشوا كلهم برا الحديقة  ماعاد بقي احد  ويوم طيحت اللي براسي وجيت اطلع واشوف الشايب خويي اللي حطيت له علك  للحين  ناشب فيه المسكين وماغير يقلّب في الجريدة حفظ لو الاعلانات عاد انا حسيت بتأنيب الضمير المستتر ومسكته مع عصاه وتليته كنه ددسن مغرز  ومن فرحته بمعانقة الحريّة عطاني 3 جنيهات استرلينيّة ( يولد مهيب شينه اشري بها من محل فريمانز ) الضعيّف ما درا اني خابزن له العلك  المهم  طلعت من الحديقه وركبت تكسي ناوي الرجعه وانا بالطريق لمحت نهر التايمز حقهم  والا يوم تحركت فيني دوافع السباحه  وقلت للسواق ستوب هير بليز  ونزلت وعلى طول رقيت فوق الجسر وفصخت ثوبي وفنيلتي وانقز من فوقه قمزتن مخلوطه بصرخه آآآآآع آآآآع  ( حشا طرزان )  واطب لك هاك الطبه رويسيه على كيف كيفك  وينهبلون السواح  ويبلغون حالة الطوارئ ان فيه حالة انتحار  ويجونك بالقوارب ويحوطون علي وانا على ظهري في المويه ومسترخي  وتافخ بطني بالهواء عشان يطفح بي ( ام الذكاء يشيخ ) ويشقلوني عندهم  ويكلبشوني  وخذ يا تحقيقات وعلمتهم اني قاعد اتحمم و ان مطافشي في النهر لمصلحتهم عشان اجذب السواح  واني ماصدقت القى زي هالنهر   الصافي مليت من بركتن عندنا اذا طبيت فيها طلعت اخضر من  ( الغرب ) والطحالب  وماصدقوا خبر اعجبتهم  التصريفه ومشت عليهم فكرة التنشيط السياحي  ويلقطني  رئيسهم   ويوقع معي عقد أي قمزه من فوق الجسر معها حركه  حلوه ( رويسيه او محيفرة او خلفية )   بيعطيني 50 جنيه استرليني  يابلاش صرفوا لي ملابس خاصه ورفضتها اجل بالله عليكم معطيني ( بكيني ) وجع يوجعهم ويقطعهم ما مثل صروال السنه اذا دبّلته عشان ما يشفّ  ( من زينك انت ومقفاك لو بيشوفونك تبدّل ملابسك غمضوا عيونهم وصدّوا )  مقفاه كنه  حبة شمام طايحه من جمس المهم  وقّعت معهم عقد كل  عشرا طبات  مقابل خمسميه جنيه ويوم  جت الطبه الخامسه مليت منهم  ومزاعقهم  وابي الفكه قلت مالي الا اني اغطس تحت المويه واسبح  وانا كاتم نفسي ( محمر وجهه ) لين ابعدت عنهم وطلعت من جهه ثانيه   تطل على اطراف النهر وعلى طول تكسي  واقرب محل ملابس ثم المطار  وهم  ياحبة عين امهم  قاعدين يدوروني تحت الماء على بالهم  اني غرقان  وفي عداد الموتى  وللحين وهم يدوّروني وانا ابو هروني  حتى اعداد هذا الموضوع طبعا شافوا صروال السنه طافح وقعدوا يدورون تحته  شفتوا الحسنه الثانيه للتدبيل  ودبلها دبلها ......