قصة مسلسل هايدي قصه  من الادب العالمي كذا كاتبين في مقدمة المسلسل الرائع  اللي شغف قلوبنا  وقتها يومني صغير كلت منها مقلب مانسيته  زبدة السالفه اني من يوم كنت صغير وانا مصدق اللقطه اللي سوتها هايدي يوم تقمز من المرجيحه  حقتها هاك القمزه اللي على طريقة  المصارع سنوكا اذا انقض على خصمه  وجت قمزتها على سحابه شالتها وقامت تدور بها فوق السهول والتلال  بصراحه  ما اخفيكم اني صدقت سالفة ان السحاب ينجلس عليه  فكرت بعدها شوي ومسحت بطرف كمي الكاكاو المتراكم على خشتي وقمت احلل الغيمه  اللي جالسه عليها وش طبيعتها الين جا في بالي  ان السحاب عبارة عن سفنج  مريح  وكبرت وانا على هالنظريه وحطيت في مجلد امنياتي امنية اني اتكي فوق احد الغيوم ذات يوم  ويكون معي براد الشاهي  وكم  بسكوت على الطاير  تخيلت الوضع حلو  ما يشابهه في حلاه  الا تكيه شايب في مشراق وقت البرد ، عموما  مرت السنين وكتب الله لي اني اكون في سفر بالطياره وقت العصر  في ايام الشتاء  طبعا الشتاء معروف بالسحاب  يالله من فضلك  وهذا زاد فرحتي اني اخيرا  قرب يتحقق حلمي واشوف الغيم عن قرب  سبحان الله زمان كان الغيم  يجي فوقي والحين  صار تحتي  ( وش عنده  دالتون بيطقها نظريه الحين )  شوي  ويزيد الغيم ويتكاثر ( حشى جراد مهوب غيم ) واخترقت الطياره اوساط الغيوم  وانا متنح عند النافذه ومطير عيوني ولو  الويندو   ( حركات يالويندو ) تنفتح  وتاسعني كان  نطلت عمري فوق السحاب على طريقة هايدي  ناديت المضيف وقلت له  لو سمحت افتح الباب  قال  : ليش  قلت : ابي اطب محيفره على اقرب غيمه    طقني بعين وجت فوق راسه علامة تعجب طولها متر  وحط يده على  جبهتي عى طريقه اللي بيقيس الحراره  وتحمد ربه  وقال الله يشفيك وراح  قلت مالي الا الكابتن ودبرت اموري ورحت له في الكابينه وعلمته السالفه  كلها وترجيته يحقق حلمي  قعد يضحك ووضح لي نظرية الغيم في شرح مبسط مخلوط ببخار الماء ومدري ويش  ويوم شفته ماشغل المساحات قلت عز الله ماتمسكه ولا بيدك عقب كلامه حطيت يديني على راسي على طريقة احمد بهجه لا  حسب عليه الحكم  فاول وهو ماسوى شي وقلت الله يجزاه خير اللي صنع الطياره وخلا درايشها ماتفتح  تخيلت  لو لاقيها فاتحه  كان طابن رويسيه على اقرب شعيب   قربنا نوصل ونزل الكابتن تحت  مستوى الغيم ( صار الغيم فوقي خخخ ) وهبط  ووصلنا بفضل  الله  ومنته ورحت للكابتن  قبل انزل من الطياره  وسلمت عليه  ثانيه وقلت  له انشهد انك طاره  واستر ماواجهت وودعته واول ماوصلت البيت مسكت شريط هايدي  وفكرت انطله عقب المقلب اللي سوته فيني  لكني تذكرت  انها يتيمه  واستخرت وسامحتها .  << ياحنيّن