الشخصيات :

حصيصه = بطلة السالفه وراعية الروفر ®

نويّر = راعية بر وقنص  معها هايلكس 2003

سويّر = عربجية الحاره وفزعتهم  معها اوبل

هي ناس = محل تصوير في الرياض 

هالموضوع حبيت يكون خاص في سواقة البنات بما ان حنا يالشباب تختلف درجاتنا في سواقتنا للسياره برضه البنات لهن  اشكالهن  في السواقه  عشان كذا بطلة هالسالفه هي الآنسه حصيصه اللي تعتبر احسن  طاره في الحاره طبعا حصيصة هذي  بعد ما نجحت وتخرجت من الثانويه طقت لها امها موتر يحبه قلبها  من النوع البناتي وعلى طول طارت عجتها للغرابي  بتركب انواع الزينه من تظليله موف الى جنوط فوشيه وانصدمت بأن كل هالحاجات مهيب عندهم ورجعت  من المحلات بعد ما هاش عليها العامل حق الزينه : انتي في مزنونه( انبسطت تحسبه يقول مزيونه ) في فكّر كولو زينه سيم سيم ميك اب يالله رووه مافي تزليل مافي زنط ( جنط ) لين انها بغت تزنطه من القهر . عقبها قررت حصيصه انها تسوي اللي ما يتسوى وانها تبثت رجولتها وتنسف شعرها وراها وتقلبها سامري في شوارع الرياض راحت اقرب محطه وعبّت فول ( لو راحت اقرب بوفيه وعبت فول (ارخص )  هع  بايخه  المهم مرت ربعها من بنات الحاره  وركّبتهن وراحت تدور  في كل عاير وتشطف الليموزينات وكل لفه لازم تزحّف الموتر  وخوياتها يتراقصن في مرتبة ورا(بالطول بالعرض حصيصه تهز الأرض ) شافوها مجموعة شباب وجاز لهم الوضع وتقاطرت سعابيل اديترهم ولحقوها وخذ يامطاردات من شارع لشارع لين حجروهن في سكه ضيقه بين سيارتين ( سكة التايهين ) عاد الشباب بيتحرشون بهن  ومادروا الاوحصيصه تنزل عليهم بمفك العجل وعصا العفريته وتنطلهن على قزازتهم اللي تكسرت ويوم  شافت بينزلون قامت تشّر لسيارتن جايه وخافوا تعلم عليهم وتتهمهم بالمحارش و نحاشوا وهي النحشه  ويوم وقفت السياره قالت حصيصه مابي الا سلامتك ياوجه العنز شف ذولي يحتكون بي تفاهم معهم وراحت وركبت موترها وفحطت  وقتها دق جوال حصيصه والاها خويتها نويّر راعية الهايلكس تقول لها انها بتكشت بالثمامه ومعها العدّه كلها مركّبتن شنطه في الصندوق حقت بر وحاطه فيها مكياج وبودي كير واستشوار وحاطه دافور وردي وعلمتهم انها تحتريهم هناك قد طقت الرواق وكلش  قالت مابدهاش يابنت يلزمنا نروح زهمت على العربجيه سويّر  وقالت لها تخاويها  وهم بالطريق معهم الرافور سقطت عليهم كامري تسوقها وحدة وشطفتهم  وعطتهم غمزتين  بالاشاره  يعني بدري عليكم  وتنجن حصيصه وتمعط شوشتها من القهر وتكتم لأم الدعسه  وخذ يا مساقط على الدائري  وكل ما وصلوا حول الكامري  قامت سويّر وطلّعت راسها مع الدريشه وهي تدلع لسانها ومادروا الا وراعية الكامري تحدهم على الرصيف  لين اعترض الموتر بحصيصة وخلاها تزحف لين خشبت في الكبري :( وبعد ماجت الدورية وحققوا بالحادث حطوا الخطا 99% على الكبري و 1% على الفرامل  ومدام الدعوى عوافي مع ان الحادث يخلي الواحد يقول ياكافي  قررت حصيصه انها تاخذ حقها حتى لو طال الزمن  المهم جا اجتماع بين حصبصة وسوير ونويّر في احد الكوفي شوبات وبعد ماطلعوا ركبوا سيارة النوري الهايلكس الغمارتين وراحوا لشارع التحليه بغرض التمشي والاستهبال ومشغلين اغنية مايكل جاكسون مشكلني ومطولين عليها  والا فيه واحد من الشباب موقف عندهم شكله  قاط معهم بالموتر ويقعد يطالع فيهم وحاط يده تحت دقنه ويتلّص فيهم  التفت حصيصه على نوير  قايلتن لها  وش يبي ذا هو خشمه الي  تسنه نقانق  عارمها تكروني   التفت عليه  سوير العربجية  وقالت : هذي سيارة ترا مهيب محل  هي ناس  رد عليها الولد  وقال وش هي ناس انا قاعد اطالع احلى ناس  وما كمل كلامه الا وشريط خذاني الشوق حق نوال ماخذن لفّه على خشته  وتفتح الاشاره  والا يوم  جاهم هاك الذيب الازرق يقول عوووو <== وش جاه ذا قام يخور عفوا والا يوم شافوا قداهم كامري مشكوك فيها  ويوم  قربوا يمها فزت حصيصة من مكانها وبوبزت على المرتبه ويديها على الطبلون وآآآآآع  هذي هي الحماره اللي حدتني لين  طبع الروج حقي في  سميت الكبري  والله انها هي جعلها الماحي هي وقرونها  نفس اللوحه وتدحج الطبلون لين انكسرت حقت الببسي   وتبدا اللحظات المثيرة  ويبدا الدم حق جميس بوند يمشي بعروقهم  راحو وراها بدون ما تدري  عشان ما تخاف وتنحاش ويوم وقفت عند محل مناسبات  ونزلت والا هذولي ربعنا في وجهها طبعا هي ماعرفتهم  وقفوا قدام وجهها حصيصة معها معصاد الجريش و سوير معها مغرفة الفول  نويّر معها ملقاط الجمر  جايبته من الشنطه <== مهيب تشيّش ابد ( امزح منيب حاط في ذمتي شي هع ) J المهم قالت لهم نعم وش تبون واقفين قدامي غرض حاجه ؟ ردّو عليها بصوت واحد عندنا مناسبة سعيدة  وبنحتفل في وجهك  وتبدا الهوشه والطق والطقيق وتمعيط الشوش  ونيويّر من زود النذاله تمسك بالملقاط  خشمها وتقبص عليه  لين غدا احمر كنه طماطتن طايحتن في سيراميك

طبعا الشباب ماصدقوا خبر اجتمعوا  عشان يفكون النزاع ومنهم اللي لقط الغنايم اللي عبارة عن شباصات مختلطه بالدم وبكلات موف كلها  بيحتفطون بها للذكرى   وبعد دقايق جت اللومينا تسوقها الملازمه جهيّر  منقطع الحزام حق بنطلونها تخبرون مسكينه  تداوم  وهي بالشهر الثامن  يحلفون  ان حزام الامان متلطم به الجنين من زود التكّه

وبعد التحقيقات واخذ الرخص ودتهم للحجز وهناك صار تنازلات وحوسه وطلعت حصيصه ومن معها بكفاله  وتعهد انها ما تسبب مشاكل ولا تحرش بباقي السيارات حتى لو اخطوا عليها

وبعد هذا كله  وبعد ماسيطر وضع البنت على شوارعنا المتعطشه للألوان المزركشه   اكتشفت ان الوضع بيكون له ايجابيات وسلبيات فيما لو ساقت البنت وطبعا هالاشياء ليست إلا تكهنات هارونية فقط

الايجابيات :

* ماعاد انحن شايفين سيارات توصيل طلبات ولا شي  كل وحده بتخلص لزومها وتروح تشري وتطلب  

*  بنلغي شي اسمه سواق من الوجود  ونوفّر غرفته في البيت الى مستودع تحط فيه البنت قراشيع موترها وطياسها وامور الزينه  الا عاد اذا صارت عجوز كبيرة يمكن تجيب اندونيسية سواقه عاد تخيلوا الوضع وقتها كيف بيكون  العجوز تركب ورا في الفان والسواقه ( تيريزا ) معها كيسة الاندومي في يد  وماسكه الطاره باليد الثانية وين ماما ؟

العجوز : روحي يم طريز الامير عبدالله بن عبدالعزيز اباخذ لي مقاضي من ممكلة الطفل

<== حالمه انها والدة J

السواقه : ماما كيف روه مافي معلوم طريق  انا فوق كبري خليج

العجوز : وجع يصرم بطنتس بتودينا للبحرين وقفي فيذا خلي نسال

انت يالاخو  وين  طريز الامير عبدالله  وصّف للسواقه كود تفهم

الولد : شوفي صديقه روه سيده بعدين  كبري فوق  بعدين تحت  بعدين طريق السواقة : معلوووووم  ثانيكووووو  حؤؤؤؤ وبعد ما يشوفون الشباب هالفان وسواقه وحركات اكيد بيقولون هاللي ورا بنت دلع وغنج  مهيب متنزله حتى للسواقه  وتبدا المطاردات والتميلح  قدام الفان  الين يوقّف عند مملكة الطفل وكلهم  شاخصه عيونهم يبون هالحلوه القمورة  تتنزّل وتنزل  وكلها لحضات من الترقب وعيون ماتغضي محوطه الفان كله طلعت عليهم عصا منعفطه من اعلاها تلامس الزفت مصدره صوت غطا على فرقعة اصابعهم :) طلّت عليهم القمورة واحد منهم شهق ونحاش والثاني قال يمكن وراها  بنتها بتنزل الحين  ويوم  شافوا الموتر ينصك بابه كل واحد عض ثوبه بنابه وتلاقطوا موترهم للبحث عن مصدر آخر L 

 * بتتحول المشاغل النسائيه الى محلات للزينه واكسسوارات السيارات  وبيحطون مكان مكينة الخياطه  حفرة زي  حفرة الزيت  ما تطلع السياراة من المحل الا وهي في كامل اناقتها تقولون  هدية مغلفه بورود الحب 

من جد تخيلوا  سيارة تسوقها بنت رابطه على تندتها ورده زهريه  والا حاطه ملصق على الشنطه  صورة شاكيرا او تلقونها ماسكه المساحات  بشباصه

 * اغلب الشباب عازفين الحين عن الشغل في البنشر والورش ووقتها  اقطع يدي اليمين  واعلق اليسار على ظهري اذا ما تهاوشوا الجامعيين  على وظيفة بنشري بمرتبة سوبر شل  أو  كهربائي سيارات تخصص لفّ دينمو  

* بتزين حالات الشباب  وكل واحد  بنشوفه كاشخ اربع وعشرين ساعه 

يعني بيقولون وداعا  قميص النوم :) وماعاد انحن شايفين طماله ابد 

=========

اما السلبيات  فهي بتكون منحصرة  على مضايقات الشباب   يعني لكم  انكم  تتخيلون  انهم يضايقونهم الحين  مع محارمهم  ومع السواقين   فما بالكم  بوحده تتمشى  الحالها في  شارع العليا العام  هذا وجهي اذا  ما غدت  نقانق بالزعتر

 وطبعا بتصير أزمه في كماليات الميك اب والروج لأن كل وحده تبي تكتب على البودي حق موترها  كتابات وشطحات خنفشارية

 ناهيكم ( اصير طرمبة بنزيم على ناهيكم )  ان الحوادث بتكثر نسبتها  لأن فيه اللي بينشغل عن الطريق بالمناظر والتمقّل  وفيه اللي بيكّع فرامل فجأه من زود الانبهار  يعني بيني وبينكم   ولا يطلع لأحد  انا صراحتن ادوخ على عيون القطاوه اللي طامغينها بوسط الطريق اذا كبست فيها بالعالي وشلون اجل لو شفت عيون بنت تكبس لي  وربي اني بصير كني مزّاز في اثم تكروني مواصل له يومين  

وفي الاخير  انا اجزم بتاتا البته ان اي حادث لاسمح الله  لأي بنت تخشّب في نخله او عامود كهرب  تبي تنزل من سيارتها في حالة هستيرية  صارخةً  بكل قوه : أبي امي ابي ابوووووي  ابي زوجي  لأ مستحيييييييييل 

============

والبنات اللي  ودهن يتعلمن السواقه بكل لباقه وبدون طفاقه   ودهم يجربون حظهم  بالسواقه   يحطون حيلهم  هنا 

ارعصو السيارة هع