قبل فتره طحت في قناة تعرض مسلسل جريندايزر بصراحه خليت القناة واندمجت مع الاحداث  واسترجعت ذكريات الطفوله  والحماس  مع دايسكي  وكوجي  وقفشات  السيد دامبي  وبعدها صرت احتري موعد المسلسل كل يوم واتنح عنده واقعد احلل المسلسل بكل لحظاته لكن هناك شي قاهريني واسال نفسي دايم  ليش قوات فيقا ممثله في بلاكي  ابو راس مثلث  اللي لو يطق الكوره براسه كان انشقت ليش يرسلون صحون مينيفو على قريندايزر وهم يعرفون ان هالصحون مافي راسها حرش لو يلخها الواحد بالزبيريه انفجرت   غير كذا ليش الوحش حقهم  كل حلقه يعفج جريندايز بالاول بعدين بالاخير يقلبها عليه جريندايز  يمكن يكون اثبات لنا ان الخير ينتصر بالاخير  طيب نترك  مسلسل  مغامرات الفضاء ونجي لافتح يا سمسم هالمسلسل الرائع اللي كانت معه كل بدايتنا ونفتح له ابوابنا وقلوبنا كل عصريه لاحظت فيه امور مشت علينا زي الحلاوه مثلا السيد كعكي نشوفه يلهم من هالكيك والبساكيت وهو ماله سنون !!؟ ذا تسذا  نعمان افندي   24 ساعه مرتز عند البقاله ولا عمرنا شفناه يفرم خخخخ

 طيب مسلسل كابتن ماجد يدبل في الهوا ويمديك تروح تجيب مقاضي للبيت وترجع  مابعد طاح والا عدنان يتمسك باصبع رجله الكبيره  والا اذا طب من فوق  نشبن رجليه بالارض  ومع كل هذا الامور ماشيه  وحنا ماغير متنحين قدامهم وطايرتن بوهتنا  ومندمجين آخر اندماج  حتى انها لا جت الحلقه الاخيره  تخنقنا العبره  وحول ماتقطر دميعتنا  ويوم  توقفت هالمسلسلات وجتنا هالطقه الجديدة  لقيناها ماتسوى من يسنتر عندها  ورجعنا ندور اشرطة المسلسلات المدبلجه القديمه  وكأن حنا نشوفها لأول مره  من حلاتها  ومن ضمنها هذولي