رحلـة الى بلدة خنفستان 

 اكيد اكثركم يعرف ديرة طاجاكستان وباكستان وخرفشتان وابتلوا الين تاصلون سيارة غوّار اللي رسم فيها الحدود والديار كلها ، لكن انكم قد سمعتـوا بـديرة اسمـها (خـنفستان ) فهذي تبطي والله لأن هالديره توها طـالـعه على الدنيا وفيها من الـعـجايـب والغرايب قومه وقعده وطبعا قصتي معها قصه عجيبة  والبداية كانت يوم كنت سربوت سفريات وانا اللي اشد الرحال يم ديار ستان  على اساس اني ابجيب عمال يواسون الحوش حق بيتنا وكانت  تنقلاتي في ديارهم بالحصان   وانا اقعد الف وادور الين وصلت ديره اسمها  والله نسيتها آخرها ستان وبس  تشطرت عنهم حول الكيلو  وقلت ابستريح تحت هاك الطلحة وآخذ لي قيلولة ويوم  خذت لي غطة وانا اللي اصحى على طق الاطناب ؟ واناظر ياولد وشذا ؟ والا فيه اكثر من ثلاثين خيمة منصوبة صاروا الاوادم  فيذاك مايصدقون على الله يشوفون أحد في مكان الا ويطقون ( خنزيرة الخيمة ) وانا انهبل واروح لواحد منهم كبير شوي قلت ابسأله وابغى الوكاد وقلت له انت من أي ديره يا جميل ( ياكودها والله كلمة جميل ) صكني بعيونه الحمر   وقعد يحنتم  ويخربط مدري وش يقول ولا فهمت الا آخر كلمتين اللي هي ( بوقا وروقا ) المهم قلت ابمشي بس ماعاد لي سنع وانا اروح واطبّق كبوت الحصان لأنه كان محتر  من المشي ويوم جيت أسري والا رفيقي ابو عيون حمر جاي ومعه  ( عصى ) قلت بس هذا يبي يعفجني ويليّن جنوبي  بهالعصى  وانا اللي استعرض قدامه قبل لا يجي بحركات كاراتيه عشان اخوفه وقمت استعرض على الخيل حقي ( يآآآآآ  تادا ) واعطي الخيل رجفة باليمن  ورجفة باليسار ابي كود الرجال يرجع ويخاف وما دريت الا والخيل رافسني   على ظهري ومطيرني مترين طبعا وصلني الرجال وانا حاط في راسي انه مع البلا عوّان رفسة حصان ودبغة عصى لا والرجال متعافي عليه فخوذ وعضود كنهن ( سواري مسجد ) ويوم استسلمت للأمر الواقع والاه يجي ويقومني وينفض الغبار  عني وطبعا تراه للمعلوميه ينفض الغبار عن ظهري بس لأنهم في ديارستان مهمب راعين هالحركات احم ماعلينا وداني الرجال لخيمته وكان فيها مجموعة من ربعه وجلسني على كرسي فخم وعطاني العصى وقاموا عقبها يتطامرون حولي  اللي يحبب يدي واللي يهف الذبان عني واللي يهمز اصابع رجلي .. وجع انا في حلم والا في علم ؟ لا شكلي مابعد صحيت من قيلولتي  ، بس ماعاد عقب رفسة الخيل شي  من قوها تصحّي اللي ضاربينه ( بوايت بنج )  لكن يا ولد صارت الدعوى صز وعرفت انهم خلاص حطوني رئيس لهم وشفت الوضع زين عندهم يعني ماكل شارب ( لحيه )   ومدلل وكل شي جاهز لدرجة اني من الدلال اذا قلت ( بع ) قال واحد منهم  ( هني ) وطبعا هو ينطقها بلغتهم  كذا ( هني ستان ) واجتمعت بهم عشان نحط اسم للديره وما لقيت احسن من اسم خنفستنان لأسباب تبون تعرفونها بعدين .  وراحت  كم سنه وانا على هالدلع والفخفخه  وتعلمت من لغتهم واجد وفهمت ليش حطوني رئيس عليهم لأنهم يعتبروني الوحيد اللي اكتشف مكـان ديرتـهم          ( شويّه كولومبس )  وكل هذا بسبّة  تبطحي انا وخيلي .. ياهووووه يالتقدير ما يعرفون شي اسمه انقلاب ولا يجحدون ولا شي ، لك حق تبي تاخذه لكن جتني مشكله عويصه ما حسبت لها حساب صار كل يوم  يجيني واحد منهم  معه بنته يبيني اتزوجها وكل هذا مهوب حبن في سواد عيوني عشاني رئيسهم وطالبين القرب مني وانا والله ماودي اوهّق عمري معهم وارتبط بهم لأن وراي حوش يبي من يواسيه وكل واحد اصكه بعذر ويروح  زعلان ومخنفس وعقب كم يوم جاني خويي ابو عيون حمر وجاب بنيته مزركشة ومفركشة وقال: ان شاء الله انك  منتب مفشلني تبي تتزوج بنتي وابسوي لكم رقص وحفل يرجّ خنفستان كلها واحاول اصرفه يمين ويسار لكن ماش بيني وبينكم   الرجال يخوف مثل ماقلت لكم  مستصح وعليه ظهر كنه ( برميل تحويله ) وتعذرت بالحوش ولا نفع وتعذرت باني ابكمل دراستي ولا نفع  عاد انا جمعت قواي العقلية والتخريبية  ورفضت رفضا قاطعا خلته يعصب واحمرت عيونه زود تقول كل الدم اللي فيه رقا لعيونه وهو اللي يخنفس ويروح من عندي صايق وشوي ويرجع معه اهل الديره والخيل حقي جايبينه معهم وقالوا لي كلهم  بصوت واحد :حنا ما نبغاك رئيس  ( ضف وجهستان وورنا مقفاك ستان )  وانا انصرع ؟ من شوي قاعد اطرّب وامدّح فيهم  ما يعرفون الانقلاب ولا شي   والحين ما يشوفوني شي ؟ وقام ابو عيون حمر ورجف الخيل بوز الين قام (يناهق ) من الوجع ( ايه ياخيلي مهوب شغلك يوم  ارجفك ) عاد  انا قصرت الشر ولملمت اوراقي وحزمت شناطي وخذت لي خنفسانه من عندهم للذكرى ورحت لأقرب مطار ستان وشحنت الخيل الوجعان ولسان حالي يقوووول الفكّـــه  غنيمة من خنفستان  ...

الصفحة الرئيسية