طبعا الاسم من اول وهله ( اتقطع على اول وهله ) يخوّف ويطيّر النوم لأن القامة الحالها تروّع فيدام مشاطتها ، وصملت وانا صغيّر عاد مهوب صغيّر مره يعني صغيّر تصيغرونه اني اشوف هالمشاطة وش تصير ووش شكلها وتبون الصز كنت راسمها في مخيلتي عاد مخيلة بزر لا تشرهون ان المشاطه هذي وحده عجوز تجي تالي الليل وشكلها يروّع وتروح لجحر القامة ومعها مسفعتها والكريم الابيض وتقعد تمشّط شعر القامة . حتى انا مستغرب لأن القامة مالها شعر وشلون تمشطها ؟ واكتشفت ان المقصود بهالقامة هي ( ام جنيب ) او ام قرون واذا شفتوا القرون شاصبة ومرتزه فوق راسها وتلاصف فاعرفوا ان المشاطه مسيّره عليها من قريّب . وعلى طاري ام جنيب تصدقون اني اكتشفت ( منيب عاقل يا نيوتن ) ليش تزحف ام جنيب على جنب ولا تمشي في خط مستقيم عشان ما تتأثر القرون بعوامل الهواء القياسية اللي تخترق انعكاس الشموخ واذا مافهمتو  هالكلام   ابضرب لكم  مثال  مشابه وانتم احكموا : هالحين الواحد اذا طق تشخيصة الكوبرا وجانا كاشخ ما تلاحظون انه ما يمشي في خط مستقيم  تلقونه يجنح وعلى جنب لأنه لو مشى في خط مستقيم فسّـد الهواء شماغه ومالت التشخيصة لذلك تلقاه يحاتسيك على جنب كن فيه ابا الوجيه وعلى طاري ابا الوجيه  على كم كيلو الطماط   ؟؟  لا وازيدكم بعد معلومة مهمة وهي ان الدورية ما تقدر تقول لأم جنيب ( على جنب ) لأنها اصلا واقفه على جنب من الاساس حتى لو قال لها  ( امشي على جنب ) فبرضه هي تمشي على جنب  يعني محجره لراعي الدورية   .. ماعلينا نرجع لمشاطتنا اللي خليناها في وضع الانتظار واقول لكم  سالفتي معها : طبعا طلعت هاك اليوم للبر  مع أهلي  وقعدت احوس في هالتربات واتدحوس واستّـل جراد ونمل المهم  مرت من تحتي حشره مرنقطة ابيض واسود ( يعني مابعد وصلها التلوين ) أو انها متعصبة لنادي الشباب  ومقفاها كبير اكبر من قداميها ! وقالت لي الوالدة تراها جتك  مشاطة القامة وانا اللي ارتاع وتجيني ام الركب وقمت اصيّح على انها ذيك العجيّز اللي في بالي ويوم دريت انها هالحشرة القعنبة  وانا اللي  .... من الضحك عليها وعلى  (روحي ) وقلت لأمي هذي اللي تقولون عنها قالت ايه وببراءة البزقات قلت لها : طيب وين مشطها ؟ وضحكت علي وقالت المشط يكون عند القامه دايم  لأن الحاجه لها  ،،  المهم تركت النمل والجراد وقلت خل ابلحقها واشوف وين تروح وامشي وهي تمشي وتمشي وانا امشي وكلن منا له ادروبه . وتبون الصز والله يا مشيتها مضحكة مدري ليش اذا شفتها تمشي ذكرت ( خلاطة السميت ) ما نقص مقفاها الا انه ( يدور ) عاد تدرون وش صار عقب هالمشي  شفتها تدخل هاك الجحر وشوي ولاها طالعه معها شي في يدها ؟ ما شفته زين والا ام جنيب تزحف طالعه من الجحر من قدها وصلت ( الكوافيرة ) حقتها وانا اتوزا ورى هاك الحصاة واتابع الموقف وفعلا شي ما ينتصدق ويهول العقل  ام جنيب ولا اخس من خسيسة تنسدح عند المشاطة وتحط راسها المثلث على فخذ هالحشرة ؟؟ وبحركات سريعة وعجيبة تسويها المشاطه دريت ان الدعوى صز ولا هيب سذب واكتشفت ( يامصلي انا واكتشافاتي ) ان النقط البيض اللي بظهرها هو الكريم اللي تدهن به قرون القامة وبدون مبالغه اقدر اقول عقب ما شفتها ان المشاطه بخبرتها  وجرأتها ومهارتها قدرت تفوّق على احسن مصممي الشعر وكوافيرات ملكات الجمال والا في عقلكم من ذا اللي يبي يطيعه قلبه  ويصفف قرون ام جنيب  تبطي والله . اذا شفتها تقطع الشارع ما سطيت ولا اطاها بالكفر من الروعة ؟ لكن سلموا لي على ام مشط والله انها وليده واعجوبة وجريه واللي معجبني فيها اكثر انها تعمل بصمت ( مهيب عاقله بيل جيتسه )  بس قاهرني شي واحد بس هو اللي مهبل بي وش مقابل هالاتعاب كلها ؟ اكيد انها لاقيه مصلحة ولا ماتعنت تجرجر خلاطتها قصدي مقفاها عبث اكيد ان فيه سر  مدفون في جحرها بس وشوووو  مدري  . 

القامة:- باللهجة العامية وتعني الثعبان *