المخـــــــيـــــخ الأيـــســـــــــــر 

 مبطي كانت القنوات تجبرنا على ان حنا نتابعها ونتسدح قدام برامجها وأفلامها بداعي الضحك  معها ولها ثم بعد فتره صرنا نضحك على   سخافة برامجهم  وخلو مضمونها من المعنى والفايدة لكن ما توقعنا ولا واحد في الميه انه يجي  هالوقت اللي نضحك فيه  على اللي يقدمون البرامج  انفسهم سواء من طريقه القاءهم او ردودهم وتفاعلهم  مع برامجهم ( امحق تفاعل )   خلونا  نبدا بقطوة الشاشه الأموره  رزان المغربي اللي تقدم  برنامجها بكل غنج  ودلع وميوعه وتثني وتوزع البوسات والحركات ( النص كم )شوفوا لبسها واقلبوه صن وانا اراهن انه بيكون معكم سرا  <== يسمع بالبلوت هع المهم  تجيك في غرفة مزركشه ومصففه  وفي نفس الوقت محيوسه هذا دب منطول  فوق الكنبه وهذا بنك بانثر ابو ذنب يتدودل من فوق كنه اراجوز وما فيه لون من الالوان الا موجود كنك داخل محل رسام  وخطاط  هذا غير لبسها اول ما تشوف هاك البنطلون تقول  انهم   خايطينه من لستك  يجيك ضيييييق مرره مدري وشلون لبسته ولا تهون الفنيله اللي كنها مغسوله بكلوركس معتّق وشمرت لين وصلت سرها <== شكلهم يتقضون  فنايل ولادي   اسرع لهم J حسبي الله عليهم كل دواليبهم الحين صارت مليانه من ماركة بامفصخ  :(   والمضحك المبكي انها تكتب زاويه في احد المجلات  اغلب مضمون  كتاباتها ينادي للعقلانية والالتزام المتقوقع  على قوانص القيم  وانا اشهد ان القوانص بريئة منها  الا ان كانها تقصد قوانص الدجاج المنتف  هذا شي ثاني

  نجي لبرنامج ثاني اسمه( ياليل ياعين)  برنامج مضحك بمعنى الكلمه هز وبسط ورقص على  طقطقات وكلمات منفوشه  ومخربطه مثل شعر مقدمة البرنامج والشي المضحك بقوه انهم يعرضون الكلمات للمشاهدين  الحين من زينها عشان تعرضونها  خلوها مستوره دام ان اغلب المتابعين  يتابعون بعيونهم  بدل أذاهم   . ولو سلطنا الكشاف على برامجهم اللي يستضيفون فيها فنانه ومطربه لقينا المطربة تطلع قدام المشاهدين باسلوب انيق وتتكلم عن الأدب والذوق العام في الوقت اللي تطلع فيه بعروض فيديو كليبيه خادشه للحياء وحركات كلها تمايل واغراء !!

 خلونا نروح للأفلام عندهم  وطريقة ابتكارها نلقاهم يتلاعبون  بعقولنا في طريقة الإخراج وتسن المشاهد بزر قدامهم ما يفرق بين أفلام الكرتون والافلام الاكشنيه  وخذوا بعض المشاهد المؤثره اللي شفتها بام عيني  مهوب حتسي ينقال  :

المشهد الاول : 

مطارده بين سيارتين الاولى خاطفة أحد الأشخاص والثانية في دور اللحّاق  وفي لحظه يجيب لنا المخرج لقطه  للسياره الخاطفه وهي تنطل الشخص المخطوف  وهي تمشي بسرعه  ؟  تدرون وشو الشي المنطول  شكله واضح ما يحتاج تركيز   عباره عن 3 بطانيات ملفوفات بحبل ...  وفي روايه بمصير  J

المشهد الثاني :  واحد يتهاوش مع خويه  في احد القهاوي وفي لحظة غدر يقوم يمشي على اطراف اصابعه ويوقف عند ظهره ويطعنه بسكين صغيره ( السكين اللي تجي مع مقص الظفور )  المطعون ( بزرت عيونه ) و حط يده على قلبه ؟؟؟؟  ثم جاب المخرج لنا لقطه ثانيه مع الخلف والدم يصب من اعلى رقبته   والطعنه اساسا جايه في منتصف الظهر  طبعا لا تعليق  وللمعلوميه الشخض المطعون واحدن متعافي ( هرش) يتربع  على ظهره ابو سنامين <== ما يسويه الكاتم

المشهد الثالث   لقطه من فلم اكشن :

سيارة منحاشة ودخلت طريق ( البر )  ومع كل لفه خطره  تطلّع صوت تفحيط وهالصوت هو نفسه يطلع اذا وقفت فجأه في التراب  الا اذا كان الغبار يعني لهم دخان الكفرات  يمكن   : وياقلب لا تحزن دام   الحءءءءءء حؤؤؤؤ  شي ضروري لاعطاء الجو التمثيلي رونق خاص حتى  على الردميات   وما نقول الا على مين تلعبها يامخرج الغفله ..  

المشهد الرابع  : برضه لقطه ثانيه من افلامهم الاكشنيه :

  تجيك  سياره  داعسه اختل توازنها  ( الظاهر سواقها مواصل له يومين  مانام)  وتنحرف يم الجبل ومن يوم  يطب من فوق الجبل ماتعدى له ولا متر  الا والسياره تنفجر بوووووم ؟؟؟    ويييييييين  ياعمممممي خلوها تاخذ لها كم قلبه بعدين فجروها على كيفكم  والله ياهم عجلين على الشر ( لكن هذي مشكلة اللي يسمعون بالانفجار ) .  

المشهد الخامس : واحد في دور عنتر ( اللي يحب عبله)  حطوه حراس القصر في قفص حديدي قوي وقاموا يعذبون عبله قدامه  وانهبل الضعيف وجمّع قوته الخارقه وحط يديه بين الحديد وتعصّر قوته عشان يباعد بينهن احمر وجهه واخضر وعبله تزيد حماسه ( الحئني يآعنتآآآر )  وفي لحظه قدر يفتح له فتحه يطلع منها  عقبها جاب المخرج لنا هاللقطه الحلوه : الحرس عطّوا ونحاشوا وياروح ما بعدك روح  ويوم جا يطلع عنتر من القفص والفتحه احتك جسمه احتكاك خفيف بالعمدان الحديديه الفولاذيه  تدرون وش صار ؟ هالعمدان  قامت تهز وتمايل كنها غصن يهز خصره مع نسمات الليل J 

قبل لا انسى فيه برنامج  في قناة السودان  عباره عن استضافه لمجموعه من الاكباريات والأدباء  شوفة عيني  يجمعهم المعدّ وهم  ملتفين  على الطاولة    ويبدا البرنامج  وينتهي  والحتسي كله لمعدّ البرنامج L  أوله ترحيب و أوسطه يتكلم عن مضمون الحلقه وآخره يشكر الأدباء حضورهم  ( ماقايل لييييييك تجلس في بيتك احسن لك يا اخي  )  L

 خلونا نضغط الريموت ونغير الوجهه  لمسلسل مكسيكي  اللي لو  تتابعه من بعد الحلقه 370 فهمت القصه حقته واللي يقهرني هو طريقة الدبلجه عندهم تصدقون انهم  مركبين صوت واحد( بعير ) عمره (40 برا ) صوته يروّع  على واحد بزر صغينون  ما بعد خط شنبه؟ والعجوز عندهم صوتها صوت  ام 15 سنه  هذا غير ان المسلسل يبدا وينتهي وانت ما قضبت منه  الا  جملة ( آآآه كم أوحيبوكا يا خوليو ) 

برضه خلونا  نغير القناة و نجي لبعض برامج الفتاوي اللي تعرضها قنوات اشتهرت بالعزف والرقص ( يعني بادّين على كلش )  بكل وقاحة  جايبين ( شيخه ) على حد زعمهم ومخلين  خلق الله يتصلون ويسألونها عن الأمور الدينية اللي بريئة منهم ومن فتواهم  وخلونا ناخذ لفه على وجه المفتية حقتهم ( الوجه) مساحيق وديكورات ( الحواجب ) شوفة عيني  محدده وجوانبها منتفه ومخليتها  على شكل قوس قزح  وما يحتاج اذكركم بحكم حلق ونتف الحواجب  وياليت واحد من اللي يسألونها   سألها عن حكم نتف الحواجب كذا ودي اشوف وش راح تكون اجابتها  . المهم تبدا الحلقه  وتنتهي والاجابه وحده ما تتعدى هالجمله ( الحمدلله انتي بتعيشي في جو روحاني وثقي ان الله معكي  والاعمال بالنيات ) 

 والادهى والامرّ من هالبرنامج اللي تو  هو برنامج (قراءة الكف )اللي اتمنى من كل قلبي اني  اسطر راعيه ( كف) يطلع رقبته  من سباتها العميق  هالبرنامج من اكثر البرامج اللي فاقعه مرارتي يجي هالمدعو ( الألوسي ) وقدامه كورة فضيه لماعه ( وابراء للذمه تراه بدون رقبه ) ويقعد يفسر وينجّم على كيف كيفه والمشكله  يجيه زباين وضعاف عقول من بلاد عربيه وخليجيه واحد يتصل عليه ويقوله اسمه وعمره ومن وين هو  وما يقصر الالوسي يقوم  يقرا له مستقبله بعد ما يطلب من المتصل انه يغمض عينه اليمني ويسوي اتصال لا سلكي مع مخيخه الأيسر وبعد ما يسأله : قديش عمرك  وشو إسمآك  يقول له انت ينتظرك مستقبل مشرق  ؟؟..ياجعلك تشرق ببيالاتك  أنت ومخيخك المعفن  والثاني يتصل عليه  وبعد ما ياخذ منه معلومات بسيطه  يقول له : حبيبي إنتا مريت بحاجه اتضايقت منها  الشهر الماضي ؟ يرد المتصل  اي نعم ؟   ثم يساله ثانيه : ايوووآآآ إنتا بعد فتره بتلاحز تحسن  بسيط في مستوى المعيشه  عندك واحتمال  يكون بالك متضايق خلال اليومين الجايين  ولا تحرص اخي انك تاكل الكبسه كتير قبل النوم شكرا اخي بتمنى لك كل توفيق    ناخذ اتصال .... والبقيه شرحك  سرا

يعني بالعقل أكيد كل واحد منا قد مر عليه شي يضيق صدره  واكيد كل واحد منا مر بتجربه حلوه في حياته يعني الاجابه بنعم وارده بنسبه كبيره انا بصراحه قفلت معي وقلت باتصل عليه وابرّد حرّتي  المهم دقيت عليه  ورد الماخوذ :  اهلين شو اسمك حبيبي

 رديت عليه : ابوهارون من السعودية

الالوسي : اهلين بو هيرون  انتا اللي عندك الموقيع  بتاع  الضوبان 

ابو هارون : أيه   جعلها ( تدودي) عليك الذبان

الالوسي : بدّك تقبّص (ديودي) ؟ دحيلك ماعم بفهم عليك 

ابو هارون : خل هالكوره اللي قدامك تفهمك شو معنى تدودي

الالوسي :  عيوني فيه ناس بدهم يتصلوا وياخدوا حئهم وعشان نكسب وئت

مايحتاج  تعطيني فكره عنّك انا سبق وشيفت بطاقتاك  وحللت شخصيتاك ومستقبلك

 ابو هارون : يعني ما يحتاج مخيخات ولا شي ؟

الالوسي : لالا  مو الحين بس بدي اسالك بو هيرون اكيد انتا   مريت  بصدمه نفسيه بحياتك  خلتك تحس بكآبه وعقده انبثاقيه ؟

ابوهارون : ابدن  ما مريت بصدمه ولا هم يحزنون  من قال ؟ L

الالوسي : اجل شو ؟  يمكن ما عم تتزكر .. دخيلك ابني  خليني اساعدك   توهّق  هع  

ابوهارون  : ما اذكر شي يربطني بالصدمه  الا اني صادم لي  قطو كان يقطع الشارع

الألوسي : آآآآآ حبيبي الحين  اتوصلنا لمخيخك الأيسر  عشان هيك انتا مكتئب لأنك صدمت الأطو  وتفكّر فيه طول اليوم  وضميرك عم بيئنبك عشانك صدمتوا

أبوهارون :   عم يئنبني والا خال يئنبني Jمالك لوا انت ورويسك هالغايص  اصلا انا اتلذذ بتصديم القطاوه  والقى في تصديمهن متعه ولذّه ولو يحصل لي  اني اصدمك  ما قلت لا  يا ......  ششششششش طوووووووط   ناخذ اتصال  ثاني  الوووووه    ....

حقوق الرقعة محفوظة لأبوهارون