اييييييه يامنوّل .. يوم الواحد (قعنبّه) توه (فاقس) من البيضة ووجهه ذاك الوقت مقطعته البراءة واكبر دليل على كذا هو انك تشوف الخشّه فيها شي يتلاصف ( سارب عليها )   مدري وشو ( ايه صدقتك )  هذا غير الخلقان المدبّله وخاصة في أوقات الشتاء واذكر اني يوم  شفت صوره لي وانا صغير وكانوا أهلي مصوريني في عز المربعانيه كنت  ( كنت والا مارلبورو ) كنت  ( دربعّه ) ومنتفخ والحين عصقول منقطع ؟؟ واثر جسمي ما تفخه الا الفنايل امهات ( صوف ) ياويلكم من الله  والله يا  ( سرّي ) ذاك الوقت انه منكتم ولا فيه أمل يشوف السفر ولا نور الشمس لأنه   محاصر من جميع الجهات المهم عقب ما بدا الواحد يحبي شوي يعني يسربت بالمعنى القديم كنت  اسهر برا البيت تدرون وين ؟  ابد  حذفت عصا  عند المجباب وين تتوقعون يعني  رايح ( لعزبة ) عاد  تبدا مرحلة البثاره في هالمجباب واذا كانوا الاهل لاهين فمعناها اني اباخذ حريتي ( اطلقوا يدي )  الله من زين الحريه  عاد اللقافه وحب الاستطلاع والاستكشاف مقطعتني اول مره اسهر برا البيت ولازم احلل طلعتي واكتشف المخلوقات الغريبة اللي توافيني وتمر من عندي   وما خليت شي ما دونته في مخيلتي  .. التراب  ودبغت في مندوبه  حتى اني بغيت اموت لأن سعابيلي جايبه جهدها ذاك اليوم  واختلطت مع التراب وصار ( طين ) وما قدرت ارد النفس يوم  بلعته لأن اللقمه تحولت الى ( جمشه ) والله يخلي ( طحلت) الوالدة اللي فرقتها :( جابها الله في الوقت المناسب ،  هذا غير اللقافه اللي وصلت اني ادبغ لي في كم  ( قعسه ) وترى فيه فرق بين القعسه والقعرانه ( لا ياشيخ ) جايب معلومه جديده ؟ لأن القعسه يكون لها  ( مرتبه ) ورا أما القعرانه فهي ساده مالها شي  وهذا غير الخشاش اللي تجيبه الهواء عند المجباب يعني هالبطن صار مقمّه وكوكتيل ( ماما نوره )  والحمدلله ما نعرف هاك الوقت تسمم ولا شي مع ان حنا نضف كلش اما الحين فأي واحد ياكل وجبه ويخلط معها  وجبه ثانيه على طول يجيه تعارضات زي البرامج اذا تداخلت مع بعض يطلع لك  قام هذا البرنامج ؟  وين رحت له انا ؟؟  المهم عقب مرحلة الحبو وبعد ما ( نبت للواحد عقل ) وعرف اللي له واللي عليه صار يدوّر اي شي يسويه ويشتغله  لدرجة انه فيه طاقه تشغل لك كهرباء الوسطى لمدة 3 ثواني  ؟ يعني تلقاه يروح يلقّح النخل ويخرف ويصرم  ويزيّن هذا ويصلح ذاك مهوب مثل شباب هالوقت اذا قاله ابوه رح اخرف لنا كم تمره نتقهوى بها ،  قاله مشغول عندي برنامج  قاعد انزله ؟؟:(   ( ياوالله الفشيله انا امس جايب عامل يصرم النخل ):(  احم   ماعلينا  انا اتحداكم اذا فيه من شباب هالوقت احد قد  (  مسك معصاد وقعد يحرّك الجريش ) ، واتحداكم بعد إذا فيه احد قد حط بين رجليه عسيب  وقام يفحط به الحين يفحطون بسيارات  وعلى زفت بعد من زود الدلع ، واتحداكم اذا فيه احد من شباب هالوقت ( تكفى يبو سبعين سنه ) قد مسح نخ .... بطرف ثوبه او بكمه ماعاد فيه الحين الا مناديل كلوركس او مدري كلينكس  .؟ ، واتحداكم بعد إذا فيه احد من شباب هالوقت قد كل له ( قفر) وانا متأكد انه إذا شافهن على الصحن او معلقات  يبي يقول ( يآآآي براصي مشوية ) يا تسبديه ، وعلى طاري الشوي أتحداكم إذا فيه أحد قد كل  جراد مشوي وخصوصا إذا جاك على الخوص الحين مايتعاملون الا مع اصياخ  وشوايات وكباب وشيش ومدري ايش الله يرحم الحال بس والله  ( يافخذ الجرداة ) انه ازين من فخوذ فروج لكن حظوظ وارزاق، واتحداكم إذا فيه أحد هالوقت قد افطر على مراصيع غالي او حتى مراصيع رخيص ماعاد يفطرون الحين الا على بيض بالجبن وكبده حاشي  واسألوا ( إقبال ) :) واتحداكم ( احووووول  صجنا ذا )  إذا فيه احد هالوقت ياكل حنيني او مطازيز  ...وعلشان كذا انا اناشد ( من معي ؟) جميع مطاعم ماكدونالدز ويامال الغنيمة قصدي يامال الشام  وكنتاكي انها تحرص على التراث الشعبي في وجباتها ( اتركوني افضفض ) ويحطون بدال الهمبرجر مرصوع من هالمراصيع ويحطون في الشاورما جريش او سليق ومن هالنمونه عشان يدرون عيال هالوقت ان مالهم  غنى عن الأكلات الشعبية اللي تبي تفيدهم مهوب هالإختراعات اللي يسوونها ويحطونها لهم  ، يجيبون لحم قطاوه ويحطونه  في هالسندوتش وربعنا  مايصدقون خبر ( يرجال ما ضرك يومك صغير  .. تاكل لحم  قعران )  

 وطبعا هذي بعض المبطيات اللي مرت في ذاكرة التاريخ ومع اني فتحت لي أكثر من ارتباط في هالموضوع الا انني لازلت احاول امتطاء صهوة  الحريه ( وش يبي ذا )    واتحداكم  ( انا لله )  لاعاد امزح معكم (اتحداكم )   هذي فاضية مافيها شي .......