توه جديد على النت قلبه ابيض من ورقة اجابتي في مادة الرياضيات

 تعّرف على وحدة   وحبها وحبته الين وصلت  مرحلة حبهم للتواصل بالصوت حبيبنا على نياته وعلى الفطره  والسليقة <== والمراصيعة 

ما يعرف يصطنع ولا ينافق دايم  تسأله عن حاجات ويعطيها الإجابة اللي تجول في خاطرة  مهوب مثل بعض الناس يقعد يفقش على حبيبته ويقول انه  يسوق موتر قيمته اكثر من 100 الف وهو ما معه الا كسرة ددسن منسم  كفره  ومنعفج الشاص حقه والرفرف  فيه بويه صفرا عقب ما  تفاهم مع  برميل الزباله  وقبل فترة مخشّب في نخلة (فحّال) في حارتهم ؟  ..  المهم خوينا كل يوم يلتقي مع حبيبته ويتبادلون المشاعر  عاد حبيبته قررت توصل لمرحلة( التقرب عن عرف)  عفوا التعرف عن قرب <== عرف والا منقار  لحياته وش يسوي وش يحب وش هواياته وش وش  .. جا هاك هاك اليوم  وسألته خويته  قالت:

حمودي حبيبي : وش نظرتك للمستقبل ؟  رد عليها حمودي وقال ابد زي نظرتك للأوبرت ( يقصد الأوربت ) ابتسمت وفهمته قصدها وألحت عليه بالجواب  الين  رد عليها : بالنسبه للمستقبل فانا خايف فيه على عشة الحمام اللي في سطح بيتنا لا يجيهن عج ويحوسهن بس  وش تتوقعين يعني  ...  كشرت شوي وقالت  :اقول حمودي وش انت لابس الحين ؟ تحتريه يقول جنز والا بنطلون من ماركة فالنتاين والا ماركة ابو ذنبين :) قال بكل براءة ومصداقية  بصراحه انا هالحين لابس فنيلة خباز  وصروال سنه ضحكت وعطته لوووووول على أنه يمزح ويحب يتميلح قالت طيب وش تحب من انواع العطور ؟  تحترية يقول هوجو <== لاعب الاتحاد والا بيتهوفن قال لها : والله خابرن عندي غرشتن حاطها مبطي في درج موتري طاقتها الشمس وتبخر نصها  امشي بها حالي  وقت المناسبات  ( امحق مناسبات )  برضه  ضحكت على أنه ينكت ويستخف  دمه  قالت له حبيبي حمودي وشلون تقضي  وقت فراغك  قال  : قال اروح للديرة القديمة حقتنا  واقعد  اصيد براصي والاحق قطاوه  والا العب مصاقيل مع عيال الحارة حامت تسبدها شوي من  كلمة البراصي تعرفون من طقة الياي <== الياي وال السست ..قالت وش البراصي ؟ قال لها حمودي هذولي اللي كنهن سحالي يجن عند النجفات  وياكلن قوابس  برضه فقت خشتها وقال وآآآي وش القوابس بعد ؟ضحك وقهقه حمودي وقال هاللي كنهن بعوض ولون جنحانهن ابيض  ودايم يلاحقن النور يا بنت النور <== يسمع بالاتيكيت بيحرك مشاعرها قالت افااا يعني انا قابس ؟ <==جايه من سلطنة عمان كخخ وساعه يتعذر لها على ان يقصد اغنية محمد عبدة وانها كلمة (انما قصد بها الرومانسية القابسية) سالته سؤال  آخر قالت وش كنت قاعد تسوي الحين  حمودي ؟ قال والله يا عمري كنت قاعد  اصلح نباطتي الحين  لأن نباطتي الأوله  انقطعت مغاطتها واحترقت من الشمس .. الا صح جابتس الله ودي اخذ رايتس ..  هالحين اخلي المغاط 3 مدبولات <== من حمولة عبدالمنعم مدبولي  والا ثنتين  يكفن  بس ثنتين ما اعتقد تموت البراصي اذا فقعت عينها<== سكتت ما تدري وش يقصد ولا وش يقول تابع حمودي حديثة قائلا : طيب وش رايتس الفّها وأطويها  بأي شطرطون أبيض والا احمر والا اصفر  <== على باله ذوق الولد حشا بيشتري تنوره لها قال : شتقول حمودي والله ماني فاهمه شي قعد يفهمها  بعض المعلومات عن النباطة وعن القنص بها والأساليب المبتكرة فيها ومع انها ما اهتمت بالموضوع الا انها تجاوزت هالمعلومه بسؤال طارف  : وش اكثر شي تحبه في المرأه ؟ قال بكل براءه : والله شوفي حبوبتي انا اهم شي عندي انها تعرف تكنز التمر  ولا تكثر ماه مثل  بعض الحريم ويغدي دبسه يتقاطر من الكيس قالت له انت ومراصيعك هذا اللي تحبه فيها بس ؟ قال ايه  قالت وشعرها وعيونها وخدودها وجمالها ؟ كل ذولي مالهن سنع عندك  سكت شوي حمودي لأنه قاعد  يمسّ نباطته يجرب قوتها  وقال شوفي بقولتس شي هالحين  اذا شفتي البرصي عند النجفه

تقعدين  تمقلين  في وجهه وعيونه وذنبه والا ترصعينه  دايركت <==  متعوب عليها قالت زين باي حمودي وسكرت السماعه في وجهه زعلانه ومخاصماه على قولة  تفيدة هانم ضاق صدره  حمودي واتصل عليها قال لكم  بيرقع ما يمكن  ترقيعه  ويوم  ردت قال طبعا بعد ما تعصّر وجمع كامل قواة الرومانسيه  :

حبيبتي وش رايتس نطلع الليله نصيّد جرابيع وبالمرّة نشويهن في البر ونضبط لنا بريق شاهي  على الضو ؟  سكتت شوي وكنه سمع صوت تطريش ( بع بوع ) و سكرت السماعه في وجهه  وفصلت الفيش  بينما حمودي أخذ يندب حظه وصراحته وحبه العفيف <== عفيف والا ساجر كخخخ .. وقرر  أن يضرب عن صيد البراصي لمدة 3 أيام من تاريخه  وأن يلفّ نباطته بالشطرطون الأسود القاتم حدادا لتلك التجربه العاطفيه الصادقة التي حفظت في ملفات الفشل  ...