|
فريق القايلة يملك كل مقومات المهاره والبثاره وعندهم فنيات ما نشوفها في المحترفين الاجانب فيهم حماس منقطع النظير ونشاط يحرثون لك الملعب حرث في زمنهم ماكان فيه مشروب طاقه اكلف ماعليهم بين الشوطين يهجمون على اقرب براده ويحطون راسهم تحت البزبوز ( يسمعون بالانتعاش ) ، فريق القايله عنده ملعب ترابي عند ركن الزاويه تقبع حرمله كعلامه مميزه بدل العلم وفي وسط الثمانطعش فيه بيت نمل مخلينه عشان يكون وسم لعلامة البلنتي وهالملعب احتاج تصليحه اربعة ايام من الجد والمثابره مع توفير عده تتكون من مقشه ومسحات وعربانه ومرابيع وخشب محملينهن من عماره توها عظم اما سبب التسيمه فهو عشانهم مايلعبون الا في عز الظهر والقوايل ضاربين بضربة الشمس عرض المرمى عموما اعضاء الفريق وعلى مدى مباريات السنه ضربوا لنا امثله كثيره في كيفية التعامل مع المستديره المجنونه من البساطه والفن منها ان الطقم حقهم عباره عن فنايل علاقي مشوخله عشان المسام تاخذ راحتها عندك المهاجم حقهم خربها في عز المباراة يوم ناداه المدافع يبيه يساندهم بهجمه مرتده وقال له يامحمد يامحمد رد عليه المهاجم : سمّ !! وبعد ماراحت الهجمه جا له المدافع وهو يضحك ويساله وش الطاري تقول سم ؟ قال المهاجم والله منيب يمك حسبت ابوي يناديني بالمقابل هناك قذيفه خارقه للعاده تقف امامها المعادلات الفيزيائه حائره من قدم الخصم تصطدم بالعارضه الخشبيه مما ادى الى انهيار المسامير وسقطوها فوق دمجه الحارس ليتم توقف اللعب اجباريا ونزول دفعتين الدفعه الاولى معها شاكوش ومسامير لتعديل العارضه والثانيه لقطت الحارس وهو ينزف للمركز الصحي والمضحك المبكي ان الحارس اردفوه بالسيكل وهو يتوعد بالثأر رغم وجود تقطيعات بسبب الصياح والنشقه بس اللي فهموه منه انه قال الوعد الطلعه يقصد طلعة المدرسه من جهة الحكم فطبيعة اي حكم لمباراة يكون فيها فريق القايله طرف معناها لازم ينفرش وينجلد مهوب لأنهم مافيه امل يفوزون لكنه حسب تفسير علماء النفس تعبير فسيولوجي لحرّة الهزيمه ومن جهة الجماهير فهم متربعين في ظلال الموتر ويساندونهم بقوه لدرجه ان واحد منهم معلق في الصندوق كتابه عريضه مكتوب فيها ( هذا القايله محد طايله ) ( فريق القوايل يسوي الهوايل ) وطبعا كل هالتشجيع مهوب حب في سواد عيونهم كله علشان يكون لهم نصيب من ترمس التوت البارد بعد المباراة
ومن قوانين الفريق ان عندهم مبدأ اسمه اللي يشوتها يلحقها لكن احيانا يشوت اللاعب الكوره ولا يروح يجيبها بحكم انها شطفت ولامست شورت المدافع ( ابوكاروهات المطرز بزهور موف ) لين يتبرع واحد مثالي ويروح يمها او توافق واحد جاي للملعب ويشوتها لهم اما من ناحية توقف اللعب فهو يكون في ثلاث حالات الاوله ان الكوره تسطح في بيت الجيران ووقتها راح يدب اليأس في قلوب اللاعبين لأن الكوره بترجع لهم مشقوقه ، الحاله الثانيه ان الكوره الطايشه تصادف سياره تتوطا في بطنها ومالهم الا يستمتعون بسيمفونيات الطرطعه الوداعيه الحاله الثالثه ان راعي الكوره تمسك معه غلط ويركب راسه في حالة زعل ويقوم حاط الكوره تحت ابطه ومتجه لبيتهم وسط تراشق العيارات وترجيم كم حصاة توشّ عنده المهم بعد سلسلة كامله من الهزايم المره لفريق القوايل قرر الكابتن حقهم انه يبحث عن اسباب الخساير خاصه انهم يلعبون شوط واحد للمباراة كلها ولهم مرماهم الخاص اللي يختارونه دايم وبعد ماحللوا الصغيره والكبيره حتى اثم الحارس حقهم فحصوه وشعر راسه فلوه ومالقوا الا قملتين وام عشيش ميته وبعد التحري اكتشفوا السبب الرئيسي للهزيمه وهو ان العارضه حقت مرمى الخصم مايله ( يحتكون ببرج بيزا ) وهالميلان تسبب في تضييق الخناق للهداف حقهم وتسبب في صغر الباب بعدها قرر الكابتن بفكره ماتخرش المويه انهم يتقدمون باحتجاج للفيفا ويرسلون مع الاحتجاج هالخشبه المايله اللي تسببت بهزايمهم كدليل ثابت وبعد ماتم الارسال بالبريد وطال الانتظار جاهم الرد و تفاجأوا ان قرار الفيفا ينص على شطب شي اسمه فريق القايله من الوجود وارسال شيول وقلابي لدفن الملعب لأن العارضه اللي وصلتهم كانت مليانه ( ارضه) وكلت اغلب اوراقهم وشوي وتاكل ملابسهم لتنتهي اسطورة الفريق ويردد جمهوره اللي خششهم لازالت مرتسمه باللون الاحمر من اثار التوت صارخين : رب عارضه قالت لمهاجمها دعني ...
هذي صورة جماعية للفريق وبعض جمهوره في ملعبهم
ملاحظه : الموضوع نشر في جريدة الجزيرة يوم الجمعه 3/8/1425 هـ
|
