يقول الخبر

(( منذ ديسمبر الماضى حدثت انفلونزا الطيور فى 10 دول ومناطق باسيا مما ادى الى هلاك عشرات الملايين من الدجاج بسبب المرض او عن طريق الذبح وتم ذبح مليون ونص  دجاجه خلال 3 ايام ))

من قريت هالخبر رحت على طول لدحّيم ولد جيراننا  وعلمته  وقام من الروعه وراح لعشة الدجاج اللي بالمزرعة وقبس فيها بدون رحمه لين غدن هالضعيفات  سود محترقات وحده منهن شوفة عيني قدرت تنحاش وريشها مولع ولسان حالها يقول ياروح مابعدك روح  يالله لا تسلطه علينا وعلى طول تبي اقرب مغطس  لكن مالحقت للأسف

عقبها قاموا اهل الحاره كلهم  يقلدون الوضع المأساوي اللي نطل دجاجه من السطح واللي حطهن بكرتون وراح بهن لمكان مجهول  وكل يوم  ماغير نسمع البقبقة والمطاردات الملتهبه وعقبها بكم يوم ارتفعت اسعار الشوايات وبهارات الدجاج   بشكل خيالي يا والله البلشه انا بصراحه بعد هذا كله ما اشوف ان الدجاج سبب مقنع لهالمرض  واعتبرهن  ضحيه وما منهن شر ليش ما تسلطوا على البعوض اللي قاعد يصول علينا ويشرب من دمنا كل يوم وخاصه هالايام اللي شان حملته بكل قوه

ليش ما يشنون حمله للقضاء عليه دامه يسرح ويمرح في يدينا ورجولنا حتى خدودنا اللي مانصحى من النوم الا وهي كن فيها مكياج من الحمره

لا تشرهون علي صدقوني اكتب لكم هالموضوع وعندي بعوضتن ذابحتني  في عمري يعني الواحد قاعد في أمان الله ويكتب وهالباعوض حاط حيله ومشغّل الماطور ويشفط من كثر دمي هالحين يومه انه طاق بير ارتواز في رجلي ؟

المشكله اني فيني طبع اقعد اهز رجلي تقولون نافضها الكهرب لكن ماخاف واللي فاقع مرارتي ماله صوت ابد شكله حاطه على الصامت

او صامت برنه وحده لا مر عند رجلي ما تسمعوون الا ( طط ) (لا تشرهون ناقصه دم)

عاد المره الاوله سكتت له حكيت رجلي برجلي الاخرى وقلت اكيد خذ كفايته الظاهر جايب ربعه كلهم تقولون عازمهم على مفطح ماعاقت ما امداني اكتب

الا والرجلين كلهن يحكن 

قلت الوضع ما ينسكت عليه واطلق صفارات وقوع الخطر وانزل تحت لرجولي وياللهوووووول  باعوضتن وش كبرها تقولون بالعتن علك اخذت برنت سكرين لرجلي وكبرتها والاها تعكس غروب الشمس

وانا اقول ليش حسيت بدوخه قبل شوي اثر هالناموسه مهيب ترفع راسها ولا لاتقولون بربري طايحن في ربيع

وبعدها لقيت يدي اللي تحكني وناظرت والا بعوضه ثانيه شابكه الدينمو  ومعبيّه معها جيك منهل وعلبة صحه صغيره حاطه في راسها رضاعه الظاهر عندها توم وناويه تغذيهم

ياقرهم مسميني  (صريع البعوض) الا على فكره يقولون فيه شراب للرجلين يطلع لهن اصابع كنهن دسوس هو صز ؟

يعععع شكلهن يخوفن ولا تقولون  واحدن واقفن على يديه ( من زين التشبيه)

 

عاد البعوض فيه ميزه تقهر ما ندري عنه الا اذا خلص وطار ليته من يوم يشبك خرطومه (فيل مهوب بعوض ) نحس فيه كان قد رصعه الواحد واستراح

وفكرت  بعد ابخ جسمي كله بالفليت بس كذا خطر علي لو بيشب احد زقارته عندي باقبس على طول وباغدي كني  ذره محترقه وازيدكم بعد صار من ضمن انواعهن بعوض ملكّع معه ولاّعه لا شاف ساقن فيها شعر يشب في المكان اللي بيشفط فيه يعني نصيحه اي واحد يشمّ ريحة حسحسه ترا الدعوى فيها قرصه انتبهوووو تلاحقوا  عمركم  خلو الباعوض يصرخ هاربا ياقررررصه ماتمممممممت