|
وش يضر الحال لو قال قروي ....لا بس ثوب كساني ، امترقع ، وامتشقق ، الله اللي قد عطاني ، القناعة والبساطه ، والفرح لو جاني ساعة.. يلتفت حزني بسياطة القوايل ، والهوايل ، مالها عندي مثايل أرتشفها كل لحظه ، والحظوظ اللي تمايل ، طرفها جيت أبغضه وانعمت في وسط عيني . والدموع بوسط جفني مالها طاري تجيني ، كل حزني احتويه واشربه لين ارتويه ، وارقى فوقه واعتليه كود فرحي يعتليني وش يضر الحال لو قال قروي ، جسمي اللي ارتوى من مغاتير الأمومة ، يفترش هاك الحصير ويشرب المويه بزير ومسبحه هاك الغدير بين نخل وبين طين وش يضر الحال ؟ دام الحال راضي ، كل يومي شايل هاك المقاضي ، فوق كتفٍ صار للأوجاع ماضي ، ما تأوه من شهور ومن سنين من يلوم الحال قل له : وش لقيت في النعومه والتغنج ؟ وش لقيت في حياة كلها لعب وتزلج ؟ وش لقيت في حياةٍ كلها نوم وتسدح ، كلها عشق وتندح ، كلها أكل وتبطح؟ وش يضر الحال لو قال قروي وش عليه ان كان حظي ملتوي ، وصار قلبي من همومي مكتوي ، وذيب حزني يطلق اصوات العوي ، مالي غير اني اعيشك يالدهر وش يضر الحال دام النفس سمحه ، ودام عيني ترتوي منّـك بلمحه ، ما تغزك مثل صدر جاه رمحه ، همها شوفتك في عز وسرور التمدن والتحضر ، والتثني والتخصر احمد الله مالي فيهن ،، والميوعه والتكسّر ، والتغنّج والتكبّر ، صار قلبي ما يبيهن وش يضر الحال لو قال قروي وش عليه ان كان : شمسي مابها في وظلال ، ودام جرحي يشتكي غدر الليال ، ودام وقتي ما به افراح ودلال ... يكفي ان القلب ينبض بالوفاء وش يضر الحال ؟ دام صيفي يلتحف برد الشتاء ، ودام بردي ياصل اطراف المدى ، لين تزهر في عيوني زهرةٍ تدمع ندى ، لازم احكي للزهر غدر الخريف وما يضر الحال لو قال قروي
=============== حقوق الرقعة محفوظة لأبو هارون |