يقول الخبر :

ذهب رجل أعمال أجنبي إلى حد بعيد في تعريفه للفنادق الفاخرة وافتتح فندقا للكلاب والقطط يتيح للحيوانات الأليفة فرصة النوم على بُسُط عجمية ومشاهدة التلفزيون والاختلاط بأقرانها .

 

اكيد اغلبكم صعقه ذا الخبر وحط يديه على راسه على طريقة اللاعب احمد بهجه اذا ضيع هجمه يعني حبكت مع رجل هالاعمال اللي احلف بالله ان فلوسه مضيقه عليه وانه يغرف منها بكريك انه يفتح هالفندق للقطاوه ؟

حطو لهن جمعية خاصه قلنا ماعليش دلعوهن وروشوهن واضافوهن في التابعيه حقتهم قلنا ماعليش عطوهن وجبات خاصه مطوره مشيناها قلنا يمكن احسن من هالعظامه وباقي العراش ، برضة زرعوا اعضاءهن في الاوادم تصبّرنا وقلنا الحاجه هي السبب مع ان حنا خايفين ان ابن ادم يجيه يوم وينابح والا يشامخ على الجداران بعد كم سنه بس تخبرون لزوم العمليات الجراحيه ومتطلباتها ، لكن يحطون لهن فندق ثلاثة طوابق وأجنحة فاخرة وخدم وحشم هذي ما نرضاها ابد وش بقي لنا حنا يالملحطين ندربي روسنا بين هالشقق العزابيه وكل واحد معه مطرحته وتقطر سعبولته لا شاف لوحة الفندق قاطعن قلبه الاجار ويمر من جنبه كنه مار من عند وزارة ، تجيك هاك القطاوه تاخذها بارده مبرده لا سلامة شنباتها

وحده من الثنتين يانعامل قطاوتنا مثلهم او يعاملونهن مثلنا ( يبطون والله )

 قطاوتنا اللي بالحاره تعيش ازمات واضطرابات نفسيه ما تحسد عليها بسبب الحظر الغذائي عليها هذا غير انها تسكن بخرابه نصف نجمه بين اكوام القواطي وكيسان الجبن الملحسه واذا كتب الله وطلعت قطوه بحثا عن حرية التنقل في الشوارع وعند البقالات بحثا عن جبنه تايهه او تونه تسمم راعيها ولا كملها لقت العجب العجاب فكل شباب وبزارين الحي في مهمه مستعجلة واطلق واحد فيهم هو اللي يلقحه ويصكّه بالزبيريه بحيث انه لا طقته تخليه يطبق علامة السفتي قبل ما تشوفون غبرته هذا غير انه مطارد حتى بالسيارات ولا تكمن ( أروح كروسان بالزعتر على تكمن ) المهاره القياديه الا اذا لحقنا عليه قبل يوصل الرصيف وطقطقنا بعظامه او شطفناه وخليناه لاهوب حي ولا ميت لين تجي تريله تكمل عليه بينما هم في الغرب لا مر قطو في الشارع وقفو يحترونه يروح ولو يمر آدمي او عجوز معرعره خرشوهم بالبواري والتلعين وزين ما فحطوا على خشته عشان كذا نلقاهم بكل ذهانه ما يمشون الشارع الا ومعهم قطوه او كلب ( حنّا مانمشي الا بسلسله وابن امه يزعق بالبوري ) وبيني وبينكم ليتهم ما يرصعون عيون القطاوه على الزفلت ويتعبون ارواحهم تكفي العيون الطبيعية اللي متبعثرة في كل خط وشو له الكلافه .

عاد لو جينا للجانب الايجابي للقطو عندنا لقينا حظه ان ضحك فهو في استراحه او مزرعه يعطونه من باقي اكلهم  هذا ان كتب الله وطلعوا اهلها يشوون فيها هاك الليله ومن علامات احساسه بالأمن والراحه نشوفه رافعن ذنبه كنه انتل ( احلالات من يربط فيه استيشن ) وان شاف راعيه وخويه جلس يتحكك في ظهره رايح جاي بس زي ماقلت لكم الحاله النفسيه لازالت مضطربه يعني بيجي راعي الاستراحه هاك اليوم متهاوش مع مرته او واحد من ربعه او ان الاجار حق بيته واصل وبتكون واصله معه لحظتها والضحيه هو القطو المغلوب على امره اللي توه في طور الحنان لأنه وقتها بيكون بين السماء والارض بفعل رجفه من نوع ( الظفر ) تخليه في عداد المفقودين وأوراق الشكوى المرفوعه من اهله تئن فوق رفوف جمعية الرفق بالحيوان ..

بصراحة  من جد صرت اخاف يجي اليوم اللي اتمنى اكون فيه قطو وانعم بالدلال والرفاهيه اللي انحرمت منها عمري اللي راح

 

لكم انكم تتخيلون معي شكل القطو بذاك الفندق وش بيكون شوفوا هالصوره واحكموا عشان تدرون ان الدلع واصلن حده 

 

ياويل قلبي تدليك وتهميز وحمام مغربي وحنا زين ان تروشنا بالعيد او ليلة عرسنا  وان بغينا احد يدلكنا خلينا اخونا الصغينون يرقا علينا ويقامز ومن فوقنا بعد

ما انكر ان عندنا نسبه قليله مره من اللي يحطون قطاوه ببيوتهم ويسمونهن اسامي حلوه لكن توصل نلبسهن روب ونحط لهن بطه صفراء بالبانيو ياكودها <== بتاكلها تحسبها صز

اكلف ماعليهم يحطون لهن جبنه مثلثه ويرشونهن بالليّ حق الحوش ومن بعيد

ولا انكربعد ان فيه ناس متوحشين ما يرحمون ما يصدقون على الله يشوفون القطو داخل البيت الا ويجيب الساكتون ويرجدونه

 

واكرر من خلال هالموضوع  واطالب بضرورة اعطاء القطاوه حرية التنقل وين ما تبي ولا نتعرض لهن الا اذا شفناهن طابات على عشة الحمام او باديات بالشر 

 وخذوا مني بعض الحاجات الهارونيه اللي لقيتها تقطع القلب بعضها يصير  مقصود وبعضها صدفه  وغصب عنّا

بعض القطاوه تحب الدفا وفي ايام البرد تزبن تحت الموتر ومن رداة حظها تدخل بوسط المكينه عند الاديتر وش تسوي مسكينه الفرو منتف من كثر الروعه والمطارد المهم يجيك راعي الموتر ويشغل مويتره على نياته وما تسمع الا شتشتشتش عنننآآآآآآآآآآآ ميوووو  طققق وينزل ويفتح كبوت السيارة ويلقى خوينا يتبعرص حول ما يموت لاعبتن فيه المروحه

احيانا يكون تحت الموتر ولا مشا السواق رعصه مادرا

برضه  نفس الشي ايام الصيف تجي تتظلل تحت الموتر  وما تدري الا والسواق ما يمديه يشغل الا وهو ماشي  يعني ان امداها تنحاش فزين  والا انفرمت تحت الكفر  عشان كذا انصح كل واحد بيشغل موتره يرجف الرفرف رجفه خطافيه  تحذيرية  يعني عن قولة ( اهنا احد )

اللي نحجرها بالسطح نلقاها مسكينه تطب من فوق واحتمال كبير حسب توقعات  الدكتور البيطري يجيها كسر مضاعف او (cut ) في الرباط الصليبي ووقتها تبطي تلقى موعد مع سالم الزهراني

 

برضه براميل الزباله افضل مكان للجريمه نلقاه متكّي بالوسط عند احد البيوت اللي محتفله بعزومه وناطله هالكيسه السودا بوسطها كم عظم وما يمديه يلحس يديه الا والبزارين دار مادار حوله وكل واحد معه حصاة ونعله ولسان حالهم  يقول : منيييين أدبغك ياقطوووووووه