المشراق
في الماضي كان عبارة عن مكان ترابي
يختارونه الشيّاب ويتفقون عليه ويكون
مواجه للشمس او تكون الشمس هي اللي
مواجهه له وكان فراشهم هاك الحين بساط
عادي ( اجل بساط تماتيك ) او حصير مصنوع
من الخوص الخالص وعسبان النخل وكانت
جلستهم كلها وناسه وتآلف وقلوبهم
متصافيه وفي يوم من
الايام .. جاهم هاك الوحش
؟ ( لا تشرهون متأثر بحبابه )
واحسن شي فيهم انهم في وقت الحاجه يتكاتفون ( يعني
يحطون يديهم على كتوف بعض ) وحياتهم
بسيطه (وكعبوله) ، لكن ماركة التقليد
دايم تكون فاشله وهذا انحن مع مرور
الايام وجواازت
الشهور ودفاع مدني السنينJ
نشوف مشاريق هالوقت مالها من السنع
عينه مجرد جلسه تنمّ ( حسيت بدوخه عقب
تنم ) عن فراغ وهالفراغ يقتلونه بحاجات
شبابية وبمراهقه متأخره وحلوني اوضح
لكم الشكل
والحاله اللي يكون عليها مشراق التوالي
، طبعا يكون مفروش بفرشه زلّ ايراني
وأرضيته مبلطه بلاط رخام والمساند
والمراكي طلبية خاصه وبالوان الطيف
وقدامهم الطاوله فيها العده كلها
تلفزيون ورسيفر رقمي بعد والريموت
كنترول يدور عليهم ( الله المستعان منول
تدور عليهم المدخنه ) وخذ ياتقليب في
هالقنوات واللي قاهرني ان بعضهم
يحط شمسية من زود الدلع والثاني تاك
النظارات حقات (بروس ويلس) وييين يا
جدي وشوله طالع اجل ؟ ووش فايدة
الشمس ؟ ومره من المرات وانا مارق مريت
حولهم ناداني واحد منهم ولّزم ابو
الشياب علي اني اجلس عندهم ويوم جلست
ويصب لي هاك العصير وينطل علي كيسة حب
مصري وما امداني اتواسى الا وهاك العامل
اللي مواجرينه جايب الشيشه ومضبط
امورها ايييه كملت وانا انهبل؟
وجع شيشه
في مشراق ؟ لا ومن زين الطبايع
ريحتها ريحة ( لقاح ) زين مار في اليد
كسره هما الدعوى مافيها فراولة والا
تفاح ، لا وزادني قهر يوم طقو الولد
بينهم وفلوها بلوت وماعاد لي سنع
وانا اسحب روحي من بينهم
واعط وشوي والا صوت جوال واحد منهم
ويضحكون عليه اثرها نغمة ام حديجان هوا
يالنغمه والله
وتطوروا شيابنا ؟.. بس تبون الصز
انا لاحظت ان فيه فرق كبير عن اطباع
شياب منول وهالحين .. مثلا
شياب الاولين تلقاهم
في المشراق اذا بغى احدهم يحك اذنه
تلقاه يدخل اصبعه الصغير في اذنه ويحكها
بحركه اهتزازية هستيرية عجيبه اما
الحين فهم معهم
عودان بلاستيك في آخرها ( قطن )
؟ ، وشياب منوّل يتخللون بخوصه
يكسرونها من الحصير او تكون في مخباته
من الاساس اما الحين فمعهم عودان خلال
مزركشه ومنحوته ، وايضا حقين منول اذا
بغوا يلعبنو ن تلقاهم
يخطون على التراب لعبة ام ثلاث او ام تسع
و خذ يا مطخات ، وهالحين
الله يخلف يفلونها بلوت او يجيبون معهم
بلاي ستيشن اذا استفحل الأمر
؟واحيانا تلقى واحد منهم
متسند وحاط رجل على الثانيه (
والاظنك له رجل ثالثه ؟ ) وقاعد يلعب
بالدودة في الجوال ؟ و ياخوفي بس يجينا
بعد قناة
فضائية يسمونها (خليك
بالمشراق) ويبثونها عقب كل ظهر او
عصر ثم تكمل
الدعوى L
لا وسواليفهم في هاك المشراق التراثي دايم تكون
عن تعبهم وشقاهم وعسى فلان طيب وعسى (
بقرته ولدت ) اما هالحين الله يخلف واحد
منهم يقول للثاني : بالله شفت شريط
المصارع العن امه ماخذ جايزة ( العسكار )
والثاني يرد ويقول خل عنك
بس الا ما شفت اللي قدمت نشرة
الاخبار البارح ؟ في قناة ... والله ياهي ( شق )
ويقاطعه الثالث : والله الفرق عنها
وعن ( مع أحلى الأماني ).. ياسلام على
المشراق ؟ اما
اذا جو يمشون بعد
غياب الشمس تلقى الاولين اذا جا
يقوم الواحد منهم يقول ( ووووووه ) ( اعه هه )
لكن هالوقت تلقاه يفز من مكانه بحركه
جمبازيه ويقول ( باي أولد مان ) (نشوفكم
ليتر ) ؟؟؟ هذي بعض المفارقات حبيت
اسردها لكم لأني خلاص قررت اني الغي من
راسي شي اسمه مشراق عقب هالدعاوي كلها
لأننا بهالاسم نسيئ الى تراثنا
الأصيل يعني المفروض نسميه
( دكّـه ) او مجلاس أي اسم
المهم لا يقربنا مشراق لأني أشرق
اذا سمعت هالاسم فما
بالكم اذا شفته بالشكل الموضّـح اعلاه