احيانا تكون الحبابه ( لحد يشدد اي حرف فيها ) <== تراها ما تقرب لمريم الغضبان بس توارد بعارين

تكون مضره اكثر منها نافعه يعني اذا شافوك الناس فاق خشتك وراسمن هاك الابتسامه على وجهك فاكيد انك بتكون صيد سهل لكل واحد راودته نفسه انه يشقل منك اللي هو عاووووووووووزه

مره من المرات في هالعطله يوم كنت بمكه جاني هاك الواحد والواحد الله في سماه العالي <== الحين شددو ( حبابه ) متأثر بها بقوووووه وده يسبحن خخخ .. شفته جاي يمّي ناحرني  مدري ليش اختارني من بين هاك الافواج اللي تمشي من الأوادم المهم وقفني .. توقعته يبي الرخصه والاستماره <== متعود يجنبونه المرور ، قال انا طالبك ياخوك تفزع معي وانا واثق انك منتب رادني قلت آمر وش بغيت عسى ماشر قال ابد ما يجيك اخوك محتاج له كم قرش مزنوق قلت كم يعني ؟ قال 150 ريال حق مشوار النقل الجماعي هالمبلغ هو اللي ناقص يمين يسار اعدلها ماش الرجال يتطلبني وانا احساسي مرهف <== ايه هين انت وقرمبعك .. قلت له انت وين ساكن قال بفندق ؟ قلت غريبه ساكن فندق ومحتاج حسبتك قاعد تبطح في ساحة الحرم مثل هالاجانب قال لا ياخوك انا  قضى اللي معي ومحتاج هالمبلغ ؟ ماطاعت تخش مزاجي قال يرجال طالبك وهات رقمك عشان اوصل لك المبلغ الى وصلت لديرتي وانا بيني وبينكم رايح كان يوم العيد قلت مابدهاش خل نختمها بخير وناخذ اجر هالمسكين قلت له تعال شوي خل نصدّ والا والله لو بعطيك ريال واحد قدام هالتكارنه ان يخلوني نقانق في هالشارع صديت انا وياه من شافنا قال اكيد بيعطيه حلاو باتشي <== ماصرف ابد 

عطيته مية ريال وقلت هذي تساعدك شوي وهذا اللي اقدر عليه قعد يتشكر الرجال وانا اهيم على وجهي معي شنطتي والونان حقي وكيسة القريض اللي موصيتني عليها الوالدة وما دريت الا وهاللي يطقون كتفي ويسحبون شنطتي والتفت والاهم شلقة تكارنه اللهم صل على محمد ما تفرق بينهم وانا اللي افهم قصدهم واطلع ريال وانطله على بعد مترين <== حشا ناطل قنبله كخخخخخ وهم اللي يتطامرون عليه وعينك ما تشوف الا فحطه الهروب طالع زي ( مق مق ) اللي في افلام كرتون وخوينا لا حس ولا طاري وشكله  راح بها لمطعم في شركة مكه هع لكن ماعلينا الا من النيه الصافيه والاجر على الله

وسالفه ثانيه حاصله معي طلعت من احد المطاعم دابغن لي في شاورمه تخبرون مسافر وعقب غداي قلت انقرش شوي تصبيره للعشاء ويوم طلعت والا هاك الآدمي تقولون يحتريني ويبتسم ومعه جريدة ( ركزوا على ان معه جريدة لأنها لها دخل في السالفه ) وينحرني سلام عليكم وعليكم السلام كيف الحال والله بخيرررررررر .. انا حسبته يبي يشتري موتري والا شي لكن خاب ظني المهم قال يخوي وين مكان التكاسي اللي يودون الناس قلت اخبرهم قدام شوي عند المحطه قال تكفى دلني انا جاي من هاك الديره ولازم ارجع خبري بهم يودون بعشرة اريل ولا ادري وين القاهم فهمت منه انه يبيني اوديه قلت ابشر اركب واروح به للمتسان وقلت هذا هو عاد حقين التكاسي اذا شافوا زبون يطبون عليه كنهم حقين حراج السيارات في النسيم  ويطبون على قزازتي وين تبي تروح ؟ قلت وجع يوجعك  ما تشوف معي موتر لو تبي وديتك يالله  خذوا اللي معي المهم يوم جا يحول الرجال قال معك 10 حقت المشوار وانا الي انهبل ويصير وجهي ازرق ياولد المفروض انا اللي آخذ منك عشره مهوب انت <== متعقّد من تكاسي مكه مطفرين به قلت يمكن انه ناسي بوكه والا مزنوق واعطيه عشره وآخذ لي لفه والقى ابو الشباب يقرا جريدته عند المحطه ولا عنده طاري والى ساعتكم مدري هو راح للديره اللي يبيها وا لا وشلون ما معه عشرة اريل وهو راعي وناسه وثقافه وشاري له جريده ؟؟؟؟؟ !!  لا وشكله وهو يقراها حاط رجل على رجل  يعني راعي طويله   .. الا على  الطاري  ليش كل من دخل  يحلق  وجلس على الكرسي حط رجل على رجل ؟  هع

وهذي سالفه ثالثه فعلا حاصله لي من زمان شوي وقفني واحد من ربعي ونزل بسرعه وقال تكفى طالبك قل تم ! قلت ان شاء الله تم قال الذيب في القليب قلت له نروح نطلعه خابرن معي حبل ورا المرتبه قال لالالا يعني متوهق قلت ايه وش صاير قال يبون يجوني ضيوف الحين ولا معي قيمه الذبيحه والراتب مانزل في حسابي تكفى والله اوعدك وانتا بعيد تفضل حبيبي اوعدك يؤ يؤ وش جاب ذالاغنيه قال اوعدك انه من يوم ينزل الراتب اعطيك الفلوس قلت مدام هيك برافو عليك  وخاصه ان حنا آخر الشهر ولا يهمك هاك وشفتكم ولا شفته وصار كل ما شافني سلم من بعيد وراح وانا ابيها تجي منه لكن ماش والمشكله ماعزمني كخخخخ هذا اللي ماصعن رقبتي من القهر وبصراحه دعيت عليه عقبها باسبوع انهم ما يحدرون اللي هم ماكلين من جد حسيت بقهر

عاد هذي صارت لي درس وصرت اطلب من اي واحد معروض مصدق من امير البلده واذا كان يبي قيمه ذبيحه لازم يجيب خطاب مصدق من المطبخ انه محتاج <== يبون يبصمون على ورقته بالكوارع

عموما  اكتشفت ان الناس من تالي صاروا يلعبون بذيلهم اكثر من اللزوم   والقهر بعد ان هالتلاعبات واصلتن  للعماله اللي عندنا   خذوا هالسالفه عشان اوثق كلامي ( آبوك يالتوثيق )   دخلت محل خاص بملابس رجاليه وتيشيرتات  واللزي منوووه  المهم قام العامل يوريني نوع من الاحذيه الرياضيه يقول هذا كويس مره يمشي يركض يلعب روح بحر ( الله يخلف اقرب بحر 600 ك  وقعد يمدح فيهن واعجبتني نظرتهن وشريتهن  جيته بعد شهرين ونفس الشي قعد يوريني نعال توهن جاياته وقعد يمدح فيهن قلت له لا مايحتاج هذا كويس وأشرت على اللي انا لابسهن  تغير وجهه وصاق وقال هذا خربان مافي يمشي ولا حمام  بعدين  قطع على طول ؟ انا فقيت خشتي وجع مالك شهرين تمدحهن والحين غدن شبشب حمام اوريك  ياعامل قريح وانا اللي اطلع من عنده وادخل المحل اللي جنبه محمل كيسه مليانه عشان اقهره اني شريت من غيره  مثل ماقهرني <== شاري كرتون مناديل وحاطه بكيسه هع   

عاد ما اردا من هذا الا واحد يبيع ساعات من هاللي يبسطون بهن في كل عاير  قلت بمزح معه واشوف وش عنده  اهلين صديق كيف حال كويس كم ساعه هذي ؟ قال 250 ريال وجع والله لوها جوفيال  قال لي : وبعدين  هادا مافي مويه اعوذ بالله اللي يسمعهم يقول هذا سمكه مهوب يطلع من الماء ابد هو وساعته  المهم شافني مرتاع من السعر قال شيل 200  قلت لا قال 150  قلت لا قال 100 آخر كلام قلت لا وقمت كني بروح  قال 70  اشرت بيدي لالا قام من متسانه وقال 40 عشان انتا كويس نفر ( رز ) قلت لا  جا يمي ووقف قدامي والساعه معه مدها لي قال جيب 10 ريال ومافي كلام  نفر تاني 

الصفحة الرئيسية