الزبيرية الذهبيه ** gold zobaireyah  

 مقدمه :

نحتاج الى مؤلفات وكتب لنشر فوائدها ، ونحتاج الى الكثير من الهذر لشرح خدماتها ، ونحتاج الى الكثير من الماء لتربيص متانتها . انظروا اليها تمعنوا جيدا في تصميمها والذي اراهن واجزم بأنها تضاهي في روعتها أغلب تصاميم المباني الفخمه والضخمة وناطحات السحاب .

مقطع اعلاني  ( بهاك العده )

 صدقوني انا رايح  بيدجانه مع شي اسمه زبيرية ، هي كل شي في رجليني هي عشقي وحبي ، واكيد اللي يشره علي ماجرب اللي انا جربته ولا شاف اللي انا شفته . يا حبي لها لها رفيقة دربي وعزوتي وتاج رجليني ، ويازين صوتها العذب والجذاب وهي تسحب في الارض وخاصه اذا صار مع التراب حصيات صغيرات ... يوووووه  ادوخ كذا . وللمعلوميه انا حطمت الرقم القياسي في استهلاك الزبيريات وعندي كومه في البيت يعني اللي عنده منكم نباطه ويبي لها رقعه لا يتردد لا يرده الا بريده وانا حاضر وممنون اكتير ولو اني ابقطع له قطعه من قلبي لكن فدوه  وعلى مايقول المثل  من شان رقعه تكرم زبيريه  ، وتقريبا عندي هالحين حوالي 40 جوز زبيريات أربع منهن  ( قطيفيات ) يعني يقلبن في الهوا اذا ذبيتها على أحد مقفلها معي ورافع ضغطي تاخذ لها كم قلبه في الهوا ثم ( دردب ) في ظهره ، ومنهن الكنق اللي منتفشات خيوطهن وعقودهن وكلهن زخاريف ، وفيهن النوع اللي متينه ارضيته وخشنه وهذا النوع هو افضلهن عندي لأنه يقضي لزومي وعليه ( رصعه ) جعلك ما تذوقها ، وكم مره فزعت معي الله يذكرها بالخير يوم جتني هاك العقرب اللي نافشه شعرها قصدي ذنبها وعلى بالها اني ماشفتها وانا يا محاكيكم  ماغير اغدر بها غدرة ابا الحصين في يوم العجاج ! واسوي روحي قاعد اهندس في النعله واربطها ويوم قربت مني وعينك ما تشوف الا شي كنه البرق وتسمع وشيش يروع وما امداها مسكينه تغضي الا وانا مواسيها مع الارض  ، وعني انا ان ما في عينها القطره وتمنت ان امها ماجابتها ( خفت اقول ما باضتها وتمسكونها علي) هذا غيرالحشرات اللي تغث الواحد وتنشب له تصدقون مره من الامرار ضايقتني باعوضه ( مربعه ) يعني مليانه دم ووقعت على الجدار منبهته ومغتثه تبي تنفس وتلين وانا اجيك حاقد وثاير لدمي اللي راح  هدر ويوم  هويت بالزبيريه عليها طاحت ميته قبل لا أرصعها ؟؟ من الروعه .. بعذرها والله  شافت الموت ، سطح احرش وخشن اووووه  عاد  ذكرني السطح الخشن بلعبة ( ياعسكري طلع الحرامي ) مع انهم الحين ( ذا الخكاريه ) اذا لعبوها يشترطون ان الجلد يكون بالنعال الايطاليه او القبرصيه امهات 260  ... يا سبديه  الله يذكر ايام  منول بالخير ( وعلى فكره ترى منول بالخير مهوب يقرب لعبدالله بالخير ) يعني توارد خواطر بس  .. وش اكنت اقول  اييييه منول الحرامي اذا انكشف ودروا  عنه يصفر وجهه ويخضر لأن جلده وحده  من الزبيريه الذهبيه تخليه ما يقعد على حيله ولا يمشي مثل الاوادم وذا صارت الزبيريه هي الأداة المستخدمه في اللعبه يبين في وجه الحرامي على طول لأنه يبي يشاهق وعيونه تبي تقبس من الروعه والله يكون في عونه ...عاد ما ودي اطول عليكم في خدمات الزبيريه لكن فيه شي مضيق صدري وهو ان هالتحفه الثمينه بدت تنقرض وما عاد فيه الا زبيريه وحده من بين 100 رجل وانا بصراحه اقدر اللي يلبسهن وتزيد نظرتي له ( من زين هالنظره ) لأنه يعرف من وين توكل كتف النعله ويدري ان نعال هالتوالي ما ( يسلّعن ) مجرد كشخات وبس وما اقول الا سرا ليلك  يبو زبر وعاشت ايامك  وعسى دربك طويل وعشقك الأزلي متربع  ( ومبوبز ) في حنايا الأقدام ونظرتك المذهله( ابقلب فصحى معليش ) تبعث السرور في القلب نعم اذهبي ايتها الزبيريه وابحثي عن أحبابك لا تيأسي فالطريق أمامك  وعر ( متأثر ببشار ) والرصعات المزدوجه على قفا من يشيل .. واصلي المسير واسحبي الآهات في كل الطرقات .. والممرات .. الى أن يأتي اليوم الذي تمتلئ الحارات بأنواع كثيرات من الزبيريات الذهبيآآآآت  ......